Будимпешта, 30 јануари 2024 (МИА) - Унгарскиот премиер Виктор Орбан денеска потврди дека е подготвен да ја ублажи својата позиција за предложениот пакет помош од Европската унија за Украина.

Орбан изјави за францускиот Ле Поинт пред итниот самит на ЕУ оваа недела дека Унгарија е отворена да го искористи буџетот на ЕУ за предложениот пакет помош за Украина во износ од 50 милијарди евра.

Тој рече дека Унгарија е подготвена да учествува во одлуката на ЕУ, но со гаранции дека секоја година ќе се одлучува дали ќе се издвојуваат пари за нова помош или не.

-И овогодинешната одлука мора да ја има истата правна основа - таа мора да биде едногласна, рече Орбан.

Денес, сепак, висок функционер на ЕУ изјави дека разговорите меѓу земјите на ЕУ, со цел да се договорат за помош за Украина, остануваат „тешки“ и покрај фактот што Унгарија ја сигнализира својата подготвеност за компромис.

-Сè уште не сме таму, рече претставник на ЕУ кој сакаше да остане анонимен, мислејќи на подготовките на лидерите на 27-те земји-членки на блокот за самитот в четврток во Брисел.

Додека ЕУ го притиска унгарскиот премиер Виктор Орбан да се согласи, официјалниот претставник рече дека условите на Будимпешта за укинување на ветото за финансиската помош за Киев не се прифатливи за другите земји од ЕУ.

Министрите за заеднички работи на Украина и Унгарија, Дмитро Кулеба и Петер Сијарто се сретнаа вчера во украинскиот град Ужхород, но не успеаја да постигнат решение за спорот во врска со блокирањето на клучниот пакет финансиска помош од Европската унија за Киев од страна на Унгарија.

Тензиите се разгореа меѓу двете соседни земји бидејќи Будимпешта ги попречи напорите на ЕУ да обезбеди финансиска и воена помош за Киев и одби да испорача оружје на Украина или да дозволи негово пренесување преку унгарската граница. мс/

фото: МИА архива