Скопје - Вицепремиерката задолжена за политики за добро владеење Славица Грковска, во рамки на работната посета на САД  оствари средба со Џејсон Орландо, директор на Канцеларијата за техничка асистенција при Министерството за финансии на САД.

На состанокот, како што информираат од владината прес-служба, се разговарало за веќе отпочнатата меѓусебна соработка иницирана од вицепремиерката Грковска и министерот за финансии Фатмир Бесими, со цел да се обезбеди поддршка во градењето на капацитетите, особено во справувањето со проблемите како што се перење пари, финансиски истраги, како и донесување на закон за перење пари. 

 

Скопје - Полицијата ги контролира пристапите до црквата Свети Спас, во рамки на засилените безбедносни мерки пред утрешното одбележување 151 година од раѓањето на македонскиот револуционер Гоце Делчев. Целосно се затворени за сообраќај улиците „Самоилова“ и другите сообраќајници околу скопското Кале.

Полициски сили се распоредени во поширокиот реон околу цркавата Свети Спас и по целата должина на улиците кои водат до неа. Приспап имаат само лица со дозволи.

 

Скопје – Граѓаните на 40 општини, во наредните неколку години, преку учество на Форуми во заедницата директно ќе одлучуваат какви проекти да се реализираат во нивното место на живеење.

Како што информираат од Програмата за развој на Обединетите нации, станува збор за алатка за граѓанско учество во носењето одлуки на локално ниво, која е воспоставена и успешно функционира во земјава подолго од една деценија, а сега се спроведува во рамки на проектот „Зајакнување на општинските совети“.

Програма е со вкупна вредност од 6,6 милиони долари, финансирана од Швајцарската влада и Министерството за локална самоуправа, а ја кофинансира и спроведува Програмата за развој на Обединетите нации (УНДП) во соработка со национални и локални партнери.

 

Скопје – Државната комисија за спречување на корупцијата (ДКСК) апелира до граѓаните дека не е потребен адвокат за доставување пријава до ДКСК и дека тоа можат да го направат сами, лично, по пошта или електронски.

Некои од членовите на ДКСК, меѓу другото на денешната 81 седница, информираа дека често до нив пријави доставуваат адвокати, иако тие би требало да знаат дека ДКСК не постапува и одлучува по поединечни акти.

 

Скопје - Новинарката и филмска критичарка Гена Теодосиевска е избрана за претседател на четирите жирија на меѓународната филмска критика Фипресци (Fipresci) на 73.Берлински филмски фестивал, што годинава ќе се одржува од 16-26 месецов.

Теодосиевска е позната како ТВ новинар, критичар, фестивалски селектор и познавач на филмските и визуелните уметности. Таа беше селектор, уметнички директор и директор на ИФФК „ Браќа Манаки“ од 2008 до 2020, а од 2022 година е назначена за уметнички директор на ИФФ КИНЕНОВА . Како соработник и продуцент се појавува во 23 кратки видео дела во продукција на МТВ, а беше извршен продуцент на филмот „Судијата“, прикажан на над 30-тина филмски фестивали низ светот, вклучително премиерно и на Венецискиот филмски фестивал во 2001 година.

 

Охрид – Во рамките на одбележувањето на 130-годишнината од смртта на македонскиот поет и преродбеник Григор Прличев денеска во Охрид беше промовирана Монографија по повод 70 години од основањето на Народната библиотека во Охрид што го носи неговото име.

Авторот на Монографијата, м-р Милчо Јованоски, истакна дека одбележувањето 70 години траење, издигнување и работа во континуитет на една библиотека е јубилеј што заслужува респект, почит и внимание.

Делчево - Во организација на Јавната локална библиотека ,,Илинден" и Општина Делчево промовирана е монографијата „Дејноста на МРО во Пијанец од создавањето до крајот на Илинденското востание“ од роднокрајниот автор Спиридон Митевски. Книгата е посветена на великанот на Македонската револуционерна борба Гоце Делчев, создадена по повод 150 години од неговото раѓање и 120 години од неговото убиство.

Во самото дело авторот Митевски на 136 страници носи на виделина важни податоци за улогата на МРО и улогата на Гоце Делчев во активностите во Пијанец и Малешевијата и, како што истакна промоторот на книгата, историчарот Ванчо Новоселски, во трудот се поместени и 17 фотографии на учесници и поддржувачи на МРО и две шифрирани писма.

 

 

 

Скопје – Македонскиот олимписки комитет (МОК) ја повика денеска Владата да го разреши од должноста претседателот на Агенција за млади и спорт (АМС) Наумче Мојсоски поради незаконско работење при распределбата на финансиски средства на спортски федерации и екипи, и „итно да ја замрзне постапката за доделување спортски ваучери која е во тек за 2023 година“.

Претходно денеска Државната комисија за спречување на корупцијата (ДКСК) донесе одлука да достави иницијатива до Јавното обвинителство за кривично гонење на Мојсовски и членовите на централната комисија на АМС поради основани сомнежи за злоупотреба и непочитување на ваучер системот на финансирање фондации и спортски клубови во периодот од 2020 до 2022 година.

 

Марсеј – Олимпискиот факел за Игрите 2024 во Париз ќе биде донесен во земјата домаќин со брод од Грција, каде свечено ќе биде запален во древната Олимпија, а прва станица на француската рута ќе биде градот Марсеј, соопштија денеска организаторите.

„Тоа беше прилично природен и очигледен избор“, изјави претседателот на организацискиот одбор на Олимписките игри во Париз, Тони Естенге, потсетувајќи на поврзаноста на Марсеј со Грција, како колонија која под името Масалија ја формирале древните Грци во 600. година пред новата ера.

 

Белград -  Српскиот претседател Александар Вучиќ на седницата за извештајот за напредокот на преговорите со Приштина денеска изјави дека геополитичката ситуација за Србија никогаш не била понеповолна и дека не треба „да се потценуваат потенцијалните закани што доаѓаат од Западот“.

„Ова не е прашање на љубов или идеологија, ова е прашање на опстанокот на нашиот народ и опстанокот на нашата земја“, рече Вучиќ во одговор на прашањата на пратеникот на „Двери“ Иван Костиќ.

 

Зaгреб - Предупредувачки протест пред ресорното министерство во Загреб  беше организиран од Синдикатот на медицинските сестри и здравствените работници денеска поради лошите услови за работа и непочитувањето на колективните договори. Хрватскиот стручен синдикат на медицински сестри и медицински техничари и Самостојниот синдикат за здравствена и социјална заштита организираа мирен собир и најавија можност за штрајк доколку управата продолжи да ги игнорира нивните барања, еднострано да носи одлуки и да не ги почитува нивните права.

„Ќе има штрајк доколку продолжи овој молк на Министерството“, изјави Аница Прашњак, претседател на Главниот совет на синдикатот на медицински сестри и техничари, каде има 10.600 членови. Таа особено го нагласи нерешавањето на проблемот со недостигот на медицински сестри, од кои само во Дубровник има недостиг од 375 медицински сестри.

 

Вашингтон – Турција е блиску до одлука да го одобри приемот на Финска во НАТО следниот месец, додека статусот на шведската апликација за членство во Алијансата останува неизвесен, јави Блумберг повикувајќи се на неименувани извори.

„Претседателот на Турција, Реџеп Тајип Ердоган е блиску до одлуката за одобрување на членството на Финска во НАТО… согласноста од Анкара за пристапување на Финска во НАТО треба да се очекува во средината на март“, наведува Блумберг.

 

Софија - Бугарската техничка Влада денеска положи заклетва пред претседателот на државата Румен Радев, која треба да служи на државата до одржување на предвремени парламентарни избори и назначување редовна влада.

- Пред шест месеци ја презедовте одговорноста за државата во тешко време, прогнозите предвидуваа многу негативни сценарија за економијата, рече Румен Радев на официјалната церемонија на која ги презентираше задачите и приоритетите на преодната влада. - Успеавте да го запрете „слободниот пад“ на државата, им се обрати Радев на владините министри.