МИА Општински пул

3 февруари 2023

Скопје - На територијата на Република Северна Македонија вчера се санкционирани 249 возачи поради управување возило со брзина поголема од дозволената.

Од нив четири возила се движеле со над 50 километри на час повеќе од дозволената брзина. Притоа 161 возило ја пречекорило брзината во населено место, а 88 надвор од населено место. Сообраќајните контроли продолжуваат и во наредните денови, соопшти МВР.

Скопје - Во СВР Скопје денеска околу 11:40 часот е пријавено дека на електронска адреса на осум средни училишта во Скопје е упатена закана за поставена експлозивна нaправа.

- Веднаш по добиената пријава, од полициски службеници се преземени мерки за безбедно евакуирање на училиштето и во тек се антитерористички проверки и се преземаат мерки за расчистување на случајот, информираа од МВР.

Скопје - Вкупно 43 возачи се казнети во текот на вчерашниот ден во акциска контрола во областа на сообраќајот, спроведена на територија на цела држава. Од нив 23 санкции се за возење без возачка дозвола, седум мерки поради возење за време на прекршочна санкција (забрана за управување со моторно возило)...

Како што соопшти МВР, во однос на возилата кај 42 констатирани се неправилности и преземени се мерки, од кои три за неисправни сопирачки, шест поради измината важност на сообраќајната дозвола..

Скопје - Во Полициска станица во Радовиш на 01.02.2023 околу 14.00 часот е пријавено дека на социјалната мрежа Фејсбук на страна на здружение за заштита на животни е објавена видео снимка на која се гледа тепање куче, со употреба на тврд предмет, од страна на С.Т. од село Ораовица.

Од страна на полициски службеници, информираа денеска од МВР, веднаш се преземени мерки, лицето е пронајдено, со него е извршен службен разговор и преземени се сите потребни активности.

Скопје - Во работата на општинската администрација на Гази Баба почна да се спроведува проектот „Твој службеник" чија цел е да ги открие проблемите на граѓаните од терен и нивно полесно решавање во рамките на локалната самоуправа, објави градоначалникот Бобан Стефковски.

- Идејата е граѓаните да може лесно и брзо да дојдат до решавање на проблемите со кои се соочуваат секојдневно.

Охрид – Во рамки на одбележувањето на 130-годишнината од смртта на македонскиот поет и преродбеник Григор Прличев денеска во Охрид беше промовирана Монографија по повод 70 години од основањето на Народната библиотека во Охрид што го носи неговото име.

Авторот на Монографијата, м-р Милчо Јованоски, истакна дека одбележувањето 70 години траење, издигнување и работа во континуитет на една библиотека е јубилеј што заслужува респект, почит и внимание.

Охрид - Со низа и свечености и културни манифестации Охрид деновиве ќе ја одбележи 130-годишнината од смртта на великиот поет и преродбеник, Григор Прличев.

Чествувањата по повод годишнината од упокојувањето на Прличев почнуваат денеска, со промоцијата на книгата „70 години библиотека „Григор Прличев“- Охрид“ на авторот Милчо Јованоски.

Куманово - Зголемен е обемот на работата на ЈП „Куманово Паркинг“, откако претпријатието доби специјализирано возило „пајак“, соопштија денеска надлежните од претпријатието.

Поради зголемениот обем на работа прибрани се и повеќе приходи. Просечно, дневно со новото возило „пајак“ се креваат од 15 до 20 автомобили, некогаш и повеќе особено во летниот период. Новото возило општината му го предаде на претпријатието кое го обезбеди преку под-заем со Министерство за финансии, во рамки на проектот подобрување на општинските услуги, финансиски поддржан со заем од Светска банка.

Кавадарци - Дваесет и две крвни единици беа обезбедени денеска при крводарителска акција во просториите на винарската визба „Тиквеш“.

Доктор Кирил Лазов од Институтот за трансфузиона медицина Скопје, потсети дека станува збор за традиционална акција, што се реализира секоја година. Тој се заблагодари на вработените во винаријата, за нивната хуманост.

Кавадарци - Двесте садници црн бор беа засадени денеска во Градскиот парк Кавадарци, во организација на Земјоделско-шумарското училиште и кавадаречката локална самоуправа.

- Во соработка со Општина Кавадарци одржавме теренска настава или практична настава на учениците од СОЗШУ „Ѓорче Петров“, покрај теоретската настава. За општо добро на градот, ние како институција во соработка со претставници од Општината, засадивме контејнерски садници од црн бор, обезбедени од нашиот расадник во училиштето, појасни за МИА, дипломираниот шумарски инженер Горан Сакалиев, професор по стручни предмети во областа на шумарството.