Тирана, 23 октомври 2023 (МИА) - Честитка по повод 23 октомври – Ден на македонската револуционерна борба упати единствената македонска партија во Албанија, Македонска алијанса за европска интеграција (МАЕИ).

- Македонска алијанса за европска интеграција, МАЕИ, упатува срдечни честитки по повод државниот празник 23 Октомври - Денот на македонската револуционерна борба. Овој значаен ден зазема посебно место во нашата историја, потсетувајќи нè на непоколебливиот дух и решителност на македонскиот народ, стои во честитката.

Се потсетува дека на денешен ден во 1893 година, формирањето на Внатрешната македонска револуционерна организација - ВМРО, го означила „почетокот на длабокото револуционерно движење насочено кон ослободување на Македонија“.

Тоа беше раѓање на првиот организиран политички субјект, кој го постави камен-темелникот на македонскиот отпор и ги негува стремежите за слобода и зачувување на нашиот македонски идентитет.

Датумот 23 Октомври е доказ за темелите на македонската државност, а тој е ден кој го славиме со гордост, стои понатаму во честитката и се посочува дека додека го одбележуваме овој историски настан, сите треба да се потсетиме дека наша колективна должност е, каде и да сме, да го чуваме нашето богато наследство и посебен македонски идентитет.

-Нека е вечен споменот на македонските револуционери, а нивното наследство да продолжи да не инспирира додека напредуваме во единство и решителност кон посветла иднина. Честит Денот на Македонската револуционерна борба на сите граѓани на Македонија и на Македонците ширум светот, стои на крајот од честитката на МАЕИ, потпишана од претседателот Васил Стерјовски.вт/свс/

Фото: МИА архива