14  март 2025

Скопје - Претседателот на Владата Христијан Мицкоски заедно со вицепремиерот и министерот за транспорт Александар Николоски и министерот за локална самоуправа Златко Перински, во рамки на „Каде што срцето е дома“ денеска ќе ја посетат општина Ѓорче Петров.

Скопје - Економско-социјалниот совет до крајот на месецов треба да одржи седница на која би се разговарало за минималната плата и за колку таа би била зголемена. Според законското решение, зголемувањето би било околу 1.800 денари, а Сојузот на синдикати бара зголемување за 6.000 денари со оглед на трошоците на живот, а придонесите за разликата до 30.000 денари, колку што би изнесувала минималната плата, една година да ги субвенционира Владата. Од Владата остануваат на ставот дека се согласуваат со решение што ќе го договорат работниците и работодавачите, но велат дека во Буџетот не се предвидени средства за оваа намена. 

Скопје - Претседателот на Собранието, Африм Гаши денеска ќе престојува во посета на Битола.

Како што информираат од собраниската прес-служба, Гаши ќе се сретне со градоначалникот на Општина Битола, Тони Коњановски. Спикерот ќе го посети Музејот на албанската азбука.

Скопје - Во Собранието денеска ќе има уште еден обид за одблокирање на работата на Комисијата за социјална политика, демографија и млади и Законодавно-правната комисија, на чиј дневен ред има само една точка - Предлог на законот за изменување и дополнување на Законот за пензиското и инвалидското осигурување, по скратена постапка.

Завчера работата на оваа Комисија остана блокирана, иако претседателот на Собранието Африм Гаши за претседавач ја назначи пратеничката од владејачката коалиција „Вреди“ Имрлије Сали Фетаи откако во понеделникот пратеникот Бејџан Иљас одби да ја извршува оваа функција. 

Во средата ниту на Фетаи не ѝ успеа да го стави на гласање дневниот ред на седницата откако пратеничката Јована Тренчевска од СДСМ побара дополнување на дневниот ред со Законот за бранителите. По ова, Фетаи ја затвори седницата на неопределено време. 

Скопје - Славниот шпански тенор и диригент Пласидо Доминго вечер во 21 часот ќе одржи концерт во арената „Борис Трајковски“. Со него ќе настапи и Марија Хозе Сири - една од водечките сопрани во светот, заедно со оркестарот на Македонската опера и балет. Диригент ќе биде Жорди Бернасер од Шпанија. 

Пласидо Доминго пристигна во Скопје во средата. Без ни минута одмор, славниот маестро од аеродромот директно се упати кон Националната опера и балет, каде заедно со оркестарот на НОБ ја одржаа првата проба.

Скопје - Фондацијата за културна и научна афирмација и презентација „Македонија презент” – Скопје распишува Конкурс на тема „Јас, Итар Пејо”.

Сите заинтересирани автори од сите возрасти (нема никакви ограничувања) треба да испратат свои хумористични и сатирични прилози на следниов мејл: info@macedoniapresent.mk најдоцна до 25.3.2025 година.

Скопје - Лауреатот на наградата „Роман на годината“ за 2024 година ќе биде соопштен денеска на прес-конференцијата во кафе-книжарницата „Буква“ во Скопје, со почеток во 12 часот.

Во најтесниот избор за наградата што ја доделува Фондацијата за унапредување и промоција на културните вредности „Славко Јаневски“ годинава влегоа трите романи: „Простување“ од Кица Колбе („Или-или“), „Светот што го избрав“ од Калина Малеска („Или-или“) и „И ѕирка и проѕирка“ („Антолог“).

Белград - Српскиот претседател Александар Вучиќ синоќа во интервју за подкастот на Доналд Трамп помладиот изјави дека Србија е земја која доживеа голем економски развој во последните години, држава со независен и суверен пристап кон меѓународната политика, но и земја која се соочува со протести и во која е во тек обид за „обоена револуција“ со многу пари вложени однадвор.

Во интервјуто за подкастот „Triggered“ на платформата „Rumble“, чиј автор е синот на американскиот претседател Доналд Трамп, Вучиќ рече дека Србија сè уште не е членка на ЕУ и дека е земја која е на „нов пат“ кон нејзиниот развој.

Белград - Светиот архиерејски синод на Српската православна црква (СПЦ) ги повика „сите кои на кој било начин се вклучени во актуелните настани во Србија“ да ги прекинат поделбите и да иницираат братски дијалог.

-Црквата ги повикува сите оние кои на кој било начин се вклучени во актуелните настани, да размислат за сопствените гревови и да ги покажат плодовите на покајанието за време на Велигденскиот пост, време на покајание и простување, за секој од нас да биде подобар и Христовите зборови „Како што би сакале луѓето да ви прават, така правете со нив“ да бидат нашето златно правило, стои во соопштението на СПЦ.

Бања Лука - Пратениците на Народното собрание на Република Српска (РСС) синоќа го усвоија Нацртот на новиот Устав на РС, според кој овој ентитет на БиХ ќе се прогласи за држава, ќе има право на самоопределување, а Советот на народите на РС и потпретседателите на РС се укинуваат.

Според усвоениот нацрт, се укинува  државјанството на Босна и Херцеговина и се споменува само ентитетско државјанство, а се занемарува можноста за влегување во воен сојуз со други држави, како и правото на конфедерација со друга држава.

Вашингтон – Американскиот потпретседател, Џеј Ди Венс, денеска изјави дека би бил шокиран доколку претседателот Доналд Трамп поддржи распоредување нуклеарно оружје понатаму на истокот на Европа.

Британските медиуми пренесуваат дека Венс одговараше за барањето на полскиот претседател Анджеј Дуда, САД да го префрлат нуклеарното оружје на полска територија како дел од стратегијата за одвраќање од потенцијални идни руски напади.

Вашингтон - Американската војска мора да работи на обезбедување опции за да се осигура дека САД имаат целосен пристап до Панамскиот канал, потврдија двајца американски претставници. Според нив, Белата куќа и наредила на американската војска да развие опции за зголемување на присуството на американските сили во Панама.

Американскиот претседател Доналд Трамп постојано изјавува дека сака да го „врати“ Панамскиот канал, кој се наоѓа на најтесниот дел меѓу Северна и Јужна Америка и се смета за еден од најстратешките и најважните водни патишта во светот, но не понуди детали за тоа како би го направил тоа, ниту дали би била потребна воена акција.

Вашингтон – САД и Израел контактирале со претставници на три источноафрикански земји за можноста за преместување на Палестинците од Газа на нивна територија, објави американската  агенција АП, повикувајќи се на американски и израелски извори.

Според АП, контактирани се официјални лица од Судан, Сомалија и отцепениот регион Сомалиленд.

Меѓутоа, суданските власти соопштија дека го отфрлиле предлогот, додека официјални лица во Сомалија и Сомалиленд рекле дека не биле запознаени со такви разговори.

Киев - На состанокот со американската делегација во саудискиот град Џеда, Украина јасно стави до знаење дека нема да се согласи да се откаже од членството во НАТО како дел од потенцијалниот мировен договор со Русија, пишува украинскиот весник „Европска правда“, повикувајќи се на неименуван извор.

Изворот запознаен со преговорите изјавил дека целта на средбата не била финализирање на поширок договор, а украинската страна ги информирала американските партнери за нејзините црвени линии.

Изворот наведува дека биле разгледани и други украински позиции за идните преговори.

Москва - Руските сили за противоздушна одбрана одбија напад од четири беспилотни летала во московскиот регион, пренесоа британските медиуми, цитирајќи го градоначалникот на главниот град Сергеј Собјанин.

Според првичните податоци во овој напад нема повредени. Три од беспилотните летала се соборени на периферијата на Москва, а едно во западниот дел на градот.

„Службите за итни случаи работат на местото каде паднале остатоци“, наведе Собјанин на платформата Телеграм.

Москва - Саудискиот престолонаследник Мохамед бин Салман во денешниот телефонски разговор со рускиот претседател Владимир Путин ја истакна важноста од брзо завршување на војната во Украина и изрази подготвеност да придонесе за нормализирање на односите меѓу Русија и САД, соопшти Кремљ.

Бин Салман ја истакна важноста од наскоро склучување договор за прекин на огнот во Украина, а Путин ги пофали посредничките напори на Ријад, каде минатиот месец се одржаа руско-американски разговори на високо ниво.

Њујорк - Администрацијата на американскиот претседател Доналд Трамп побара од хуманитарните агенции на ОН кои примаат или исплаќаат американски средства, да пополнат прашалник кој открива врски со комунизмот, социјализмот или антиамериканските верувања.

-Според копија од прашалникот што АП го виде синоќа, се поставуваат рутински прашања, додека некои се однесуваат на ставот на организацијата за абортусот или родовата идеологија, пренесе Бета.

Прашалникот бара од испитаниците да потврдат дека „проектот на кој работат не се однесува на климата или „правдата за животната средина““, дека агенцијата ја поттикнува слободата на говорот и дека „не работи со ентитети поврзани со комунистички, социјалистички или тоталитарни партии, или со која било партија што се залага за антиамерикански верувања“.

Копенхаген - Војните, конфликтите, насилството и прогонот ќе принудат 6,7 милиони луѓе да ги напуштат своите домови во следните две години, предупреди денеска данска хуманитарна организација.

-„Опасните“ кратења на меѓународната помош од страна на големите земји како САД, Велика Британија и Германија лишиле милиони ранливи луѓе од поддршката што е клучна за нивниот опстанок, нагласи Данскиот совет за бегалци (ДРЦ).

Лисабон - Претседателот на Португалија, Марсело Ребело де Соуса синоќа го распушти парламентот и распиша предвремени парламентарни избори за 18 мај, по падот на умерената десничарска влада на премиерот Луис Монтенегро.

Својата одлука Де Соуса ја оправда со желбата да се обезбеди стабилност на земјата, прецизирајќи дека 18 мај „е датумот назначен од мнозинството партии“.

Пекинг - Високи дипломати од Иран, Русија и Кина се собраа денеска во Пекинг на разговори за нуклеарните прашања на Техеран, објавија кинеските медиуми, неколку дена откако Иран одби да го продолжи дијалогот со САД за иранската нуклеарна програма.

Во 2015 година, Иран постигна договор со САД, Русија, Кина, Велика Британија, Франција и Германија и се согласи да ја ограничи својата нуклеарна програма во замена за укинување на меѓународните санкции. Но, во 2018 година, по една година во неговиот прв мандат во Белата куќа, Доналд Трамп се повлече од пактот.

Дамаск – Сирискиот привремен претседател Ахмед ал Шара го потпиша привремениот устав што земјата ја става под владеење на исламистичките закони, истовремено ветувајќи дека ќе ги заштити правата на сите Сиријци за време на петгодишната преодна фаза.

Абдулхамид Ал-Авак, еден од функционерите назначени од Ал Шара за подготвување на  уставот, рече дека се задржани некои одредби од претходниот устав, вклучително и дека шефот на државата мора да биде муслиман, како и дека исламскиот закон е главниот извор на судските одлуки, пренесуваат американските медиуми.