3 јануари 2025

Охрид – По повод 40-дневниот помен на блаженоупокоениот митрополит дебарско-кичевски Тимотеј, денеска во манастирот „Свети Климент и Пантелејмон“ на Плаошник во Охрид со почеток во 8:45 часот ќе се служи Света архијерејска заупокоена литургија.

Како што информираат од Дебарско-кичевската епархија, на литургијата молитвено ќе присуствува архиепископот охридски и македонски г.г. Стефан, со членовите на Светиот архијерејски синод, под чиноначалство на епископот стобиски г.Јаков.

По литургијата ќе се служи парастос на гробот.

Митрополитот дебарско-кичевски Тимотеј почина на 25 ноември минатата година по кусо боледување, на 73-годишна возраст. Беше погребан во јужната апсида на храмот „Свети Пантелејмон“ на Плаошник.

Дебар - Основачот и почесен претседател на единствената македонска партија во Албанија, Македонска алијанса за европска интеграција (МАЕИ), проф. д-р Кимет Фетаху, во честитка по повод Новата 2025 година, на Македонците во Албанија им посака здравје, среќа и успех во нивните семејства и заедници, со порака за обединување.

- Нашиот македонски јазик, традициите, песните, фолклорот и обичаите е она што нè прави силни и обединети како Македонци. Иако условите за политичко делување никогаш не биле лесни, ние покажавме дека и во најтешките моменти можеме да опстоиме и да се избориме за своето место во албанското општество, стои во честитката.

Додава дека изминативе три децении, откако падна тоталитарниот режим во Албанија, Македонците од Преспа до Голо Брдо, Гора и Врбник, како и во поголемите градови на Албанија, без оглед на верската припадност, покажаа огромна храброст и истрајност во борбата за своите права.

- Од организирање во невладини организации до формирањето на единствената партија на Македонците во Албанија – Македонската алијанса за европска интеграција, пред точно 20 години, ние покажавме што значи заедништво и посветеност. Како еден од првите активисти и основач на нашата партија, горд сум на она што сме го постигнале во овие две децении. Денес, помладите ја водат партијата, а ние, постарите, сме тука да им дадеме совет, поддршка и насока, наведува Фетаху.

Затоа, посочува, апелирам сите Македонци во Албанија да се обединиме и заедно да ја поддржиме македонската партија.

- Ако сами не се цениме, сакаме и помагаме, нема кој друг да го направи тоа за нас. Нека Новата 2025 година донесе уште поголема сплотеност, успех и просперитет за македонската заедница, посакува Кимет Фетаху, кој по потекло е од Голо Брдо, а живее во Тирана и е професор на рударскиот факултет.

Крива Паланка - Со средства од развојната програма од буџетот на Општина Крива Паланка во висина од 3.235.000 денари, изградени и уредени се нов спортски терен со вештачка трева и детско игралиште кај месноста Тополки во село Конопница, на влезот од Крива Паланка.

Градоначалникот Сашко Митовски, како што стои во денешното соопштение од Општината, нагласил дека терените се своевиден новогодишен подарок за младите од ова населено место.

-Продолжуваме со инвестициите во нови можности за правилен развој на младите генерации, за среќно детство на најмладите. Денов го започнавме со нова, убава, вест за младите од Конопница: од денес имаат ново детско урбано катче за безгрижни денови на најмладите, со современи реквизити и урбана опрема и нов фудбалски терен со вештачка трева, за спорт и рекреација, за здрава младина, проект реализиран со средства од Развојната програма на Општина Крива Паланка, рекол Митовски.

На оваа локација изградени се фудбалски терен со површина од 924 метри квадратни, во вредност од 2.100.000 денари и детско игралиште со површина 150 метри квадратни, опремено со модерни реквизити, во вкупна вредност од 1.135.000 денари.

Митовски порачал дека младите се секогаш во фокусот на работата на локалната самоуправа, а така ќе биде и во годинава што започна.

За 2025 година, рече, планирана е изградба и уредување на осум нови детски урбани катчиња на повеќе локации во градот.

Скопје - ЈП Водовод и канализација-Скопје соопшти дека денеска поради уличен дефект Ф-250мм на ул. „Џон Кенеди“ 2/2 во населба Чаир, прекинато водоснабдување ќе имаат корисниците на дел од истата улица (парните броеви).

Водоснабдувањето ќе биде прекинато од 09:15 часот до санирање на дефектот. 

Тетово - Планинарите од планинарскиот клуб „Љуботен“ согласно традицијата кај нив во првите денови во новата година, вчера на 2 јануари го искачија врвот Љуботен на 2499 метри надморска височина, со што се почнуваат нивните активности. На ова искачување одат само неколкумина исклучително искусни планинари.

-Веќе цел век, планинарскиот клуб „Љуботен“ на овој ден гордо ја отвора Шарпланинската порта, токму на врвот Љуботен – симбол на нашата љубов кон природата и посветеност на планинарството.  Оваа година славиме нешто повеќе од јубилеј – славиме 100 години традиција, меѓусебна почит и градење на вредности. ПК „Љуботен“ отсекогаш бил многу повеќе од клуб. Тоа е заедница што ги поврзува срцата на љубителите на планините, историја што сведочи за упорноста на генерациите, и визија што ја обликува иднината на планинарството во Македонија, информираше планинарскиот клуб Љуботен од Тетово.

Планинарскиот клуб „Љуботен“ од Тетово е формиран на 23 март 1925 година.

Скопје - Министерот за култура и туризам Зоран Љутков, градоначалникот на Општина Вевчани, Спасе Кочовски, и организаторите денеска на прес-конференција ќе ја соопштат програмата за годинашниот „Вевчански карневал“.

-На прес-конференцијата ќе бидат споделени информации за програмата и за значењето на карневалот кој се одржува секоја година од 12 до 14 јануари, по повод празнувањето на Стара Нова година – Василица, како и светецот св. Василиј Велики, соопшти Министерството за култура и туризам.

Скопје - Без вода денеска од 09:00 часот ќе бидат корисниците од  улиците „Жил Верн“, „Јордан Филиповски“ и „Есенинова“ во населбата Кисела Вода.

Како што информира Јавното претпријатие „Водовод и канализација“ - Скопје, прекинот е поради поврзување нова на веќе постоечка мрежа Ф-100мм на ул.„Жил Верн“ бр.12 во населба Кисела Вода.

Водоснабдувањето ќе биде прекинато до завршување со работните активности.