09:00 / 13 maj / 2026

Shkup – Në lagjen Kozle mbrëmë ishte vërejtur një ujk me zinxhir dhe rrip që ruhej si kafshë shtëpiake, ndërsa pas ndërhyrjes së shërbimeve kompetente është kapur dhe dërguar në Kopshtin Zoologjik në Shkup. “Pas njoftimit nga qytetarët e shqetësuar, MPB ndërhyri në vendngjarje, dhe menjëherë më pas mbërriti shërbimi profesional nga Kopshti Zoologjik i Shkupit dhe përfaqësues nga qyteti i Shkupit, dhe ujku u kap me sukses dhe në mënyrë të sigurt. Aktualisht, ujku është transportuar në mënyrë të sigurt në kopsht, ndërsa Kopshti Zoologjik i Shkupit do të kujdeset për të dhe do t'i sigurojë kujdes dhe kushte të përshtatshme në të ardhmen. Periudhën në vijim do të jetë në karantinë nën mbikëqyrje të vazhdueshme shëndetësore nga ekspertët”, njoftojnë nga Kopshti Zoologjik i Shkupit.

Shkup - Raporti vjetor i Avokatit të Popullit mbi nivelin e sigurimit të respektimit, promovimit dhe mbrojtjes së lirive dhe të drejtave të njeriut 2025, sot është në rend dite të Komisionit për Sistem Politik dhe Marrëdhënie Ndërmjet Bashkësive. Siç theksohet në raportin vjetor, qytetarët edhe në vitin 2025 më së shumë ankesa paraqitën për punën e përmbaruesve dhe gjyqësorit në përgjithësi. Në këtë segment, dominuan ankesat për kërkesat për zhbllokimin e llogarive, për lartësinë e interesit dhe shpenzimeve, të cilat i paguajnë përmbaruesit, si dhe për problemet për shkak të bllokimit të llogarive nga ana e më shumë përmbaruesve. Në pjesën e gjyqësorit, pjesa më e madhe e ankesave janë për mosrespektimin e parimit për gjykim brenda një afati të arsyeshëm.

Shkup - Pjesa e rikonstruktuar e Spitalit të Përgjithshëm të Qytetit "8 Shtatori" në Shkup do të lëshohet në përdorim sot. Në ngjarjen, siç është paralajmëruar, do të mbajë fjalim kryeministri, Hristinaj Mickoski.

Shkup - Në Kuvend sot seancë do të mbajë Komisioni për Arsim, Shkencë dhe Sport, ndërsa në rend të ditës është debati i amandamenteve për Propozim-ligjin për themelimin e Fakultetit të Shkencave Mjekësore dhe Shëndetësi në kuadër të Universitetit "Shën Klimenti i Ohrit" - Manastir. Për propozimin e ligjit janë paraqitur katër amandamente.

Shkup – Doracak onllajn për kualifikime - www.kvalifikacii.crso.gov.mk, platformë e përgatitur me mbështetje të Ambasadës së Zvicrës, e cila duhet tua lehtësojë zgjedhjen filloristëve gjatë regjistrimit në arsimin e mesëm, do të promovohet sot në Ministrinë e Arsimit dhe Shkencës. Doracakun do ta promovojnë ministrja e Arsimit dhe Shkencës, Vesna Janevska, zëvendësambasadorja e Zvicrës, Mihail Harari dhe drejtori i Qendrës për Zhvillim të Arsimit Profesional, Besnik Zendeli.

Shkup - Moti sot do të jetë me vranësira të ndryshueshme, kryesisht në pjesët perëndimore do të ketë reshje të herëpashershme shiu. Lokalisht do të ketë kushte për reshje të rrëmbyeshme afatshkurtra dhe paraqitje të bubullimave të rralla. Në pjesët perëndimore do të fryjë erë perëndimore, ndërsa përgjatë lumit Vardar erë veriore, e cila në disa vende do të përforcohet. Temperatura minimale do të jetë në intervalin prej 5 deri në 11 gradë, ndërsa maksimalja do të arrijë nga 17 deri në 24 gradë.

Shkup - Për shkak të punimeve në rrjetin e shpërndarjes së energjisë elektrike sot nga ora 07:30  deri në orën 13:30 pa energji elektrike do të mbesin një pjesë e konsumatorëve të Çarshisë së Vjetër të Shkupit, rruga "Çarshia e mbuluar" dhe "Samarxhiska" në Komunën e Çairit, informoi QRMK Shkup.

Uashington - Mburoja e mbrojtjes nga raketat e propozuar nga Presidenti amerikan Donald Tramp mund t'i kushtojë vendit më shumë se një trilion dollarë gjatë dy dekadave të ardhshme, theksohet në raportin e zyrës për buxhet të Kongresit amerikan (CBO) të publikuar mbrëmë, njoftoi DPA. Një organ mbikëqyrës i pavarur i buxhetit i vlerësoi shpenzimet totale për "Kupolën e artë" në rreth 1,2 trilion dollarë gjatë 20 viteve, duke përfshirë afërsisht një trilion dollarë vetëm për shpenzime për furnizim. 

Uashington – Presidenti amerikan Donald Tramp mbrëmë deklaroi se të gjithë të burgosurit politikë në Venezuelë në fund do të lirohen, sepse administrata e tij i thellon lidhjet me ushtruesen e detyrës presidente e shtetit, Dellsi Rodrigez, informon DPA. “Do t’i nxjerrim të gjithë”, u tha Trampi gazetarëve në Uashington para se të shkojë në Kinë. Edhe krahas operacionit ushtarak amerikan në janar që rezultoi me arrestimin e liderit autoritar Nikollas Maduro, qindra kritikë të qeverisë mbeten të arrestuar në Venezuelë, bëjnë të ditur grupet për të drejtat e njeriut, transmeton DPA.

Uashington - Irani ende disponon me pjesën më të madhe të sistemeve të tij të raketave mobile dhe arsenalin e raketave, publikuan mediat amerikane duke iu referuar vlerësimeve të besueshme të shërbimeve amerikane të intelegjencës, Sipas "Njujork tajms", vlerësimet tregojnë se Teherani ka ruajtur rreth 70 për qind të sistemeve mobile të lëshimit dhe të rezervave të raketave të paraluftës. Gjithashtu, gazeta shkruan se Irani përsëri ka qasje në pjesën më të madhe të bazave nëntokësore të raketave dhe rreth 90 për qind të infrastrukturës së tij nëntokësore dhe platformave të lëshimit.

Uashington - Presidenti amerikan, Donald Tramp, sot deklaroi se në Pekin do të zhvillojë një bisedë të gjatë me presidentin kinez Shi Xhinping lidhur me luftën në Iran, por, gjithashtu, theksoi se nuk mendon se nuk ka nevojë për ndihmën e presidentit kinez. "Nuk mendoj se kemi nevojë për ndonjë ndihmë me Iranin. Do të fitojmë në një mënyrë ose në një tjetër, në mënyrë paqësore ose ndryshe", u tha Trampi gazetarëve përderisa largohej nga Shtëpia e Bardhë për të udhëtuar drejt Kinës.

Kiev - Të paktën dy persona janë vrarë në sulmet ruse ndaj qytetit ukrainas Krivji Rog, njoftoi DPA. Katër persona tjerë janë lënduar në sulmin e mbrëmshëm, duke përfshirë edhe një vajzë nëntëmuajshe, e cila u dërgua në spital në gjendje kritike, ka shkruar guvernatori i Dnjepropetrovskit, Oleksandar Hanzha në Telegram. "Janë vrarë një grua 65-vjeçare dhe një burrë 43 vjeçar", shtoi ai.

Buenos Aires – Dhjetëra mijëra njerëz dolën në rrugët e Buenos Aires dhe qyteteve të tjera të Argjentinës në protesta kundër shkurtimeve të paralajmëruara të buxhetit për universitetet shtetërore. Studentë, profesorë, përfaqësues sindikalë dhe politikanë opozitarë protestuan kundër masave për kursim të presidentit ultraliberal Havier Milei, i cili mori detyrën në vitin 2023. Në kryeqytet, protestuesit u mblodhën në sheshin "Plaza de Majo" para pallatit presidencial, duke mbajtur pankarta me mesazhin: “Pa arsim nuk ka të ardhme”.