Куманово, 21 февруари 2022 (МИА) - Куманово објави оглас за избор на правни субјекти за заловување кучиња скитници, соопштија денеска надлежните од општината. Според објавата на електронскиот сајт за јавни набавки, заинтересираните треба да понудат услуги за заловување на кучиња скитници и нивното згрижување на територија на Општина Куманово. Заинтересираните треба да достават потврда за регистрирана дејност како доказ дека е регистриран како физичко или правно лице за вршење на дејноста поврзана со предметот на набавка или доказ дека припаѓа на соодветно професионално здружение согласно со прописите на земјата каде што е регистриран и решение за регистрација на објект-прифатилиште за сместување на кучиња скитници и нерегистрирани кучиња издадено од Агенцијата за храна и ветеринарство. Крајниот рок за доставување на понудите е 4 март, годинава. Куманово со години наназад спроведува годишен тендер за заловување кучиња скитници и организира акција за вдомување во соработка со избраниот оператор и со здруженија на граѓани. Изведувачот е должен да ги залови кучињата, вакцинира, да ги смести во прифатилиште и да спроведе акции за вдомување. ам/свс