Белфаст, 18 декември 2024 (МИА) - Суд во Белфаст утврди дека полицијата во Северна Ирска е одговорна за овластување шпионирање на двајца истражувачки новинари со цел да се идентификува еден од нивните извори.
Судот ја поништи одлуката од 2018 година на поранешниот началник на полицијата во Северна Ирска да го овласти надзорот над Тревор Бирни и Бери МекКафри за да го откријат изворот на протекување доверлив документ, откриен во документарниот филм што двајцата го направиле како новинари.

Полицијата на Северна Ирска на секој од нив ќе треба да му плати по 4.000 фунти (4.800 евра).

Истражниот трибунал (IPT), кој има надлежност за случаи на злоупотреба на истражните овластувања, исто така утврди дека полицијата на Северна Ирска и Метрополитен полицијата - лондонската полиција - незаконски го ставиле Бери Мекафри под надзор во две одделни операции, во 2012 година и 2013.

Тревор Бирни и Бери МекКафри беа уапсени во 2018 година откако снимија документарен филм за тоа како пробританските паравоени групи убиле шест католички мажи за време на таканаречениот период „Неволји“.

Документарецот покажа дека полицијата се договара со убијците.

Жртвите гледале натпревар на Светското првенство меѓу Ирска и Италија на телевизија во паб во селото Лофиниленд, Северна Ирска, во 1994 година, кога убијците влегле и отвориле оган врз нив.

По документарниот филм, домовите и канцелариите на двајцата новинари беа предмет на полициски претреси, кои потоа Високиот суд во Лондон ги оцени како „несоодветни“.

Ова доведе до вонсудска спогодба, по што полицијата на Северна Ирска се согласи да плати отштета од 875.000 фунти (повеќе од милион евра) на двајцата новинари и на продуцентската куќа која стои зад нивниот документарец.

Во 2019 година, новинарите поднесоа жалба до ИПТ, тврдејќи дека биле предмет на незаконски надзор.

Шефот на полицијата на Северна Ирска, Џон Баучер, рече дека ги „прифаќа“ наодите на судот, според кои полицијата „не успеала доволно да го процени постоењето на најважен јавен интерес што го оправдува мешањето во новинарски извори пред да го одобри надзорот“. зш/
фото Пиксабеј