Athinë, 18 mars 2025 (MIA) – Shefi i diplomacisë Timço Mucunski dhe ministri i Shëndetësisë, Arben Taravari sot në mëngjes janë në vizitë të të lënduarve në zjarrin në Koçan të cilët janë të hospitalizuar në dy spitale të Selanikut, ndërsa ministrat i shoqërojnë zëvendësministri i Punëve të Brendshme të Greqisë Kostas Julekas kompetent për zonat Maqedonia dhe Trakia dhe zëvendësministri i Punëve të Jashtme Tasos Haxivasiliu, informon korrespondentja e MIA-s nga Athina. 

Televizioni shtetëror ERT njoftoi se Mucunski e ka falënderuar Greqinë dhe se të lënduarit janë të duar të sigurta, përderisa portali i Selanikut “Testival” publikoi një video dhe fotografi nga mbërritja e Mucunskit dhe Taravarit para spitalit Papanikollau. 

Agjencia e lajmeve ANA-MPA shkruan se dy ministrat i vizituan tre pacientët e hospitalizuar në Departamentin për djegie në spitalin Papanikollau dhe biseduan me prindërit e tyre, ndërsa menjëherë pastaj pritet t’i vizitojnë të hospitalizuarit në spitalin ushtarak. 

Ministri Julekas duke folur në mëngjes për televizionin grek “Open” tha se bashkë me Taravarin do t’i vizitojnë të lënduarit me djegie të cilët po mjekohen në spitalin Papanikollau dhe në spitalin ushtarak 424 në Selanik dhe “bashkë me ministrin e Shëndetësisë do të jetë edhe zëvendësministri i Punëve të Jashtme Haxivasiliu. 

“Në çdo rast jemi në kontakt të vazhdueshëm me autoritetet spitalore dhe mjekët që po monitorojnë të lënduarit për gjendjen e të plagosurve. Ky është një rast tragjik, një aksident tragjik, një tragjedi kombëtare dhe për fat të keq këta njerëz janë në një situatë të vështirë. Që në momentin e parë Greqia hapi dyert e saj, dyert e spitaleve të saj, siç është rasti me Turqinë dhe vendet e tjera fqinje, për t'i ofruar të gjithë ndihmën e mundshme këtyre njerëzve të cilët në këtë moment të vështirë të jetës po bëjnë një betejë të vështirë”, tha Julekas.

Siç njoftoi dje MIA, ministri i Shëndetësisë Taravari paralajmëroi se do t’i vizitojë pacientët të cilët gjenden në spitalet në Selanik dhe Sofje. 

Në spitalin Papanikollau në Selanik janë hospitalizuar tre persona, ndërsa në spitalin ushtarak të Selanikut 424 dy të tjerë të lënduar, të gjithë me djegie të rënda. 

Mbrëmë vonë, siç njoftoi MIA, me aeroplan C-130 të aviacionit ushtarak grek nga Shkupi në Athinë ishin dërguar tre të lënduar në zjarrin në Koçan dhe janë hospitalizuar në spitalin ushtarak të Athinës 401 në Departamentin për të lënduar me djegie. fc/

Fotografia: Testival