Штип, 7 октомври 2024 (МИА) - Децата од детските градинки „Астибо“ и „Вера Циривири-Трена“ од Штип од денеска почнаа со одбележување на Неделата на детето. По тој повод во спортската сала „Јордан Мијалков“ во тек се спортски игри меѓу децата од градинките. Градоначалникот на Општина Штип, Иван Јорданов кој присуствуваше на одбележување на Недела на детето истакна дека задача на општината е да се создадат соодветни услови за згрижување и воспитување на децата во градинките.

-Покрај овие активности кои денеска се преземаат е да се насочат дечињата кон спортот и спортските активности, како и да имаат и здрави навики. Ние како локална самоуправа исто така имаме обврска да ги почитуваме и правата на детето, со тоа што ќе создадеме и инфраструктурни услови со кои ќе имаат посветла иднина, да живеат во овој град, да создаваат и да растат, вели Јорданов.

Директорите на двете детски градинки „Астибо“ и „Вера Циривири-Трена“, Илија Митрев и Ивана Ангеличкова истакнаа дека денеска заедно ја одбележуваат Неделата на детето. Но, и двете градинки во текот на оваа недела ќе имаат низа на настани во кои ќе бидат опфатени сите групи во градинките. Инаку денеска децата од поголемите групи се натпреваруваат во спортски игри, какошто се носење на топка, поминување на препреки и други игри. вдј/са/

Фото: МИА