Нетанјаху: Притисокот треба да биде насочен кон Хамас, а не кон Израел
- Премиерот на Израел, Бенјамин Нетанјаху денеска апелираше „притисокот да се насочи кон Хамас“ и го осуди неговото „тврдоглаво одбивање“ на договор за примирје во Појасот Газа
![Нетанјаху: Притисокот треба да биде насочен кон Хамас, а не кон Израел](https://mia.mk/index.php/images/20240818181704_big_730x400_9.webp )
Тел Авив, 18 август 2024 (МИА) - Премиерот на Израел, Бенјамин Нетанјаху денеска апелираше „притисокот да се насочи кон Хамас“ и го осуди неговото „тврдоглаво одбивање“ на договор за примирје во Појасот Газа.
- Хамас опстојува на своето одбивање и не испрати ниту свој претставник на преговорите во Доха. Затоа, притисокот треба да биде насочен кон Хамас и неговиот лидер Јахја Синвар, а не кон израелската Влада. Силниот воен притисок и силниот дипломатски притисок се само начини да ги ослободиме нашите заложници, истакна Нетанјаху.
На 15 и 16 август во Доха се одржаа мировни преговори, на кои не присуствуваа претставници на Хамас. Израелските преговарачи разговараа за прекин на огнот во Појасот Газа со катарски, египетски и американски посредници.
- Постои надеж дека значителниот притисок од САД и посредниците врз Хамас ќе овозможи да се укине противењето на Хамас на американскиот предлог, кој вклучува елементи прифатливи за Израел, наведе Нетанјаху.
Хамас пред два дена соопшти дека не ги прифаќа „новите услови“ за примирје и го осуди „американскиот диктат“.
- Постојат работи во кои можеме да бидеме флексибилни, а други во кои не можеме. Затоа, со значителни напори да ги вратиме нашите заложници, остануваме цврсти на принципите што ги воспоставивме, а кои се клучни за безбедноста на Израел, посочи Нетанјаху.
Нетанјаху утре ќе се сретне со американскиот државен секретар Ентони Блинкен. Тоа ќе биде негова деветта посета на Израел од почетокот на војната на 7 октомври. ми/
фото: ЕПА