Paris, 1 dhjetor 2025 (MIA) – Pas bisedimeve amerikano-ukrainase në Florida, duhet të zgjidhen edhe disa çështje më të vështira, deklaroi sot Presidenti ukrainas Volodimi Zelenski, i cili tani do të përpiqet të mbledhë aleatë në Evropë, ndërsa i dërguari special i presidentit amerikan duhet të udhëtojë për në Moskë për të informuar Kremlinin për negociatat.

Diplomacia e intensifikuar për t'i dhënë fund konfliktit më vdekjeprurës të Evropës në disa brezat e fundit ka kaluar Atlantikun, pasi zyrtarët amerikanë dhe ukrainas zhvilluan bisedime në një vendpushim për golf të ndërtuar nga i dërguari special i Donald Trampit dhe manjati i pasurive të patundshme, Stiv Uitkof. 

Zelenski mbërriti në Paris duke kërkuar mbështetje nga Presidenti francez Emanuel Makron, kurse nesër do të udhëtojë për në Irlandë. Ministri ukrainas i mbrojtjes është planifikuar të jetë në Bruksel për takime me NATO-n. Ndërkohë, Uitkof u drejtua drejt Moskës për takimin e nesërm me Vladimir Putinin. 

Kievi dhe aleatët e saj evropianë po i bëjnë presion Uashingtonit që të modifikojë planin e paqes të propozuar nga SHBA-ja, i cili fillimisht mbështeti kërkesat kryesore të Rusisë: që Ukraina të heqë dorë nga pjesë të mëdha territori, të zvogëlojë madhësinë e ushtrisë së saj, të heqë dorë nga ambicia e saj për t'u bashkuar me NATO-n dhe të ndalojë forcat perëndimore të hyjnë në territorin e saj. Ukraina argumenton se kjo do të përbënte kapitullim dhe do ta linte atë të cenueshme ndaj pushtimit në shkallë të plotë nga Rusia, e cila e sulmoi në vitin 2014 dhe përsëri në vitin 2022.

“Ka disa çështje të vështira që ende duhen zgjidhur”, postoi Zelenski në platformën Iks, duke paralajmëruar një agjendë të plotë takimesh në të gjithë Evropën për të diskutuar rezultatin e bisedimeve të Floridës. “Do të jetë një ditë thelbësore”, tha ai.

Sekretari shtetëror amerikan Marko Rubio, nikoqir i bisedimeve në klubin Shel Bej në Uitkof në afërsi të Majamit, dje tha se Uashingtoni është "real për sa e vështirë është kjo, por optimist, veçanërisht duke pasur parasysh faktin se kemi bërë përparim". ls/ 

Foto: EPA