15:00/ 15 maj/ 2026

Shkup - Kryeministri Hristijan Mickoski tha se autostrada nga Kërçova deri në Ohër do të përfundojë në afatin e planifikuar në tremujorin e parë të këtij viti. Njëkohësisht, potencoi, rrjedhin punët për ndërtimin e seksionit nga Tetova deri në Gostivar - Bukojçan.  "Para disa ditësh, me gazetarët kishim mbykëqyrje të aktiviteteve ndërtimore që po zhvillohen në autostradë, fillimisht Gostivar - Bukojçan, ndërsa pastaj Kërçovë - Ohër. Në këtë seksion rrugor po investohen më shumë se një miliard dhe pres që seksioni Kërçovë - Ohër të përfundojë më së voni diku në tremujorin e parë të këtij viti, i cili u harrua, dhe ajo që u harrua u shkatërrua gjithashtu", tha Mickoski në përgjigje të pyetjes së gazetarëve pas një vizite në Kërçovë.

Kërçovë - Reformat nuk janë vetëm ndryshime të Kushtetutës. Ne jemi të fokusuar në çështjet thelbësore – theksoi kryeministri Hristijan Mickoski duke iu përgjigjur pyetjes së gazetarëve për përmbushjen e agjendës reformuese pas vizitës në komunën e Kërçovës. Ai tha se janë optimistë për realizimin e të gjitha dhjetë pikave të agjendës reformuese. "Kemi pasur takim me Gert Jan Kopman, i cili e shtyn këtë proces në kuadër të Komisionit Evropian. Të gjithë jemi optimistë se nga ato dhjetë pika mund t’i realizojmë nëntë e gjysmë, ndoshta edhe të dhjetat, pikërisht kështu përfunduam, për ato që janë në grejs-periudhë", deklaroi Mickoski.

Shkup - Sistemi i kanalizimit Zajaz - Drugovë do të përfundojë me paratë e buxhetit për shkak të papërgjegjësisë së qeverisë së mëparshme, granti për këtë qëllim u humb, tha kryeministri Hristijan Mickoski. Ai shton se me punën e përkushtuar të kësaj qeverie, projekti do të realizohet, por se ata që e sollën në këtë gjendje do të mbajnë përgjegjësi. "Ky ishte një projekt jashtëzakonisht kriminal, mund ta them këtë me gjithë përgjegjësi. Një kompani që atëherë ka falimentuar, me burime të panjohura të garancive bankare, etj. Projekti u nënshkrua nga qeveria e mëparshme, si dhe shumica e projekteve për të cilat patëm kritika të mëdha nga Komisioni Evropian, sepse është pjesë e programit IPA", ka thënë Mickoski në përgjigjen e pyetjes së gazetarëve gjatë vizitës në Kërçovë.

Kërçovë - Ka përfunduar thirrja për zgjedhjen e kompanisë që do t'i financojë tre projektet kapitale në fushën e shëndetësisë dhe atë në Shtip, Kërçovë dhe Tetovë. Qeveria javën e ardhshme do t'i analizojë ofertat e dorëzuara, njoftoi sot nga Kërçova kryetari i Qeverisë, Hristijan Mickoski. "Sa i përket projekteve të lidhura me shëndetësinë, e dini se ato pjesë e partneritetit strategjik me Mbretërinë e Bashkuar. Ministria e Financave tashmë pati një thirrje ndërkombëtare, në të cilën kërkojmë që kompania, e cila do t'i financojë ato projekte, ndërsa praktikisht garancion do të japë banka Eksim e Mbretërisë së Bashkuar. Ajo thirrje tashmë ka përfunduar, i kemi ofertat dhe tashmë javën e ardhshme do t'i analizojmë", deklaroi Mickoski.

Shkup - Kryetari i Kuvendit të Republikës së Maqedonisë së Veriut, Afrim Gashi, realizoi një takim me kryetaren e Forumit të Grave të Partisë AK, Tugba Ishik Erxhan, si dhe me deputeten e Kuvendit të Madh Popullor të Republikës së Turqisë, Rukije Genç Toj, të cilat po qëndrojnë në Shkup në kuadër të konferencës së organizuar si pjesë e programit “Nga zemra në zemër” (Gönülden Gönüle) për Ballkanin. 

Shkup - Gratë duhet të bëjnë kontrolle parandaluese gjinekologjike, sepse zbulimi me kohë i sëmundjes do të thotë edhe shërimi i saj më i lehtë, theksuan sot nga Asociacioni i Maqedonisë i gjinekologëve dhe obstetërve - AMGJO, në shënimin e "Javës së shëndetit të gruas 2026". Prof.dr. Gligor Tofoski nga Klinika universitare për gjinekologji dhe obstetrikë në Shkup dhe kryetar i AMGJO-së, tha se nëse sëmundja zbulohet vonë madje edhe metodat më bashkëkohore mjekësore asnjëherë nuk mund të ndihmojnë plotësisht.

Shkup - Ministri i Punëve të Brendshme Pançe Toshkovski sot deklaroi se MPB dhe Ministria e Arsimit dhe Shkencës koordinojnë aktivitete për ballafaqim me sfidat e sigurisë në shkolla, me ç'rast nëpunësit policor dhe persona ekspert nga shkollat e mesme tashmë një kohë të gjatë zbatojnë kontrolle parandaluese dhe mbikëqyrje në terren. Në konferencën e përbashkët për shtyp me drejtorin ekzekutiv të A1 Maqedoni, Metodija Mirçev, Toshkovski në përgjigje të pyetjes së gazetarëve theksoi se këto aktivitete zbatohen edhe para incidenteve të mëparshme në shkolla.

Shkup - Ministrja e Arsimit dhe Shkencës, Vesna Janevska, tha se po punohet për ndryshimet ligjore me të cilat do të parashikojnë sanksione për prindërit, fëmijët e të cilëve kryejnë vepra të dhunshme. Në konferencën e sotme për shtyp, ministrja tha se tashmë po punohet me deputetët për të përcaktuar ndryshimet ligjore.  "Sekretari i shtetit është në kontakt të vazhdueshëm me deputetët. Mendoj se ata janë në Kuvend në këtë moment për të finalizuar ato propozime. Kjo tashmë është vendosur, ato ndryshime do të bëhen dhe mbetet dënimi prej 250 euro për çdo vepër të dhunshme të kryer ndaj fëmijës do të dënohet prindi, dhe ajo që është shumë e rëndësishme, edhe kur prindi refuzon të bashkëpunojë me shkollën dhe institucionet e tjera, tha Janevska, duke iu përgjigjur pyetjes së gazetarëve. 

Shkup - Inspektorati Shtetëror i Tregut (ISHT) nga data 10 deri më 20 maj po zbaton kontrolle në të gjithë zinxhirët e marketeve. Nëse konfirmon se ka rritje të marzhave, do të ndërmerren masa adekuate, njoftoi sot ministri i Ekonomisë dhe Punës, Besar Durmishi.  Siç tha Durmishi, 30 ekipe janë në terren, ndërsa jozyrtarisht, nga informacionet pas katër ditëve të para nga fillimi i mbikëqyrjeve, është vërejtur lirim i caktuar te pemët dhe perimet. 

Shkup - Deputeti Bejxhan Iljas, në cilësinë e kryetarit të Grupit Parlamentar të Kuvendit të Republikës së Maqedonisë së Veriut për bashkëpunim me Parlamentin e Republikës së Turqisë, sot u takua me një delegacion deputetësh nga Republika e Turqisë. Siç bënë të ditur nga shërbimi për informim i Kuvendit, në përbërje të delegacionit ishin kryetarja e Forumit të Grave të Partisë AK, Tugba Ishik Erxhan, si dhe deputetja e Kuvendit të Madh Popullor të Republikës së Turqisë, Rukije Genç Toj, të cilat po qëndrojnë në Shkup në kuadër të konferencës së organizuar si pjesë e programit "Nga zemra në zemër" (Gönülden Gönüle) për Ballkanin.

Athinë - Ministrja e Energjisë, Minierave dhe Burimeve Minerale, Sanja Bozhinovska, sot mori pjesë në një takim të përbashkët ministror me ministrat e energjisë të Republikës së Greqisë, Republikës së Serbisë dhe Republikës së Bullgarisë, Stavros Papastavru, Dubravka Gjedoviq Handanoviq dhe zëvendësministrin Kiril Temelkov i cili u mbajt në Athinë.  Ministrat theksuan nevojën për bashkëpunim të mëtejshëm të ndërsjellë në rajon si katalizator i planeve të zhvillimit infrastrukturor, integrimit të tregut në fushën e gazit dhe energjisë elektrike, si dhe fleksibilitetit dhe sigurisë së furnizimit. U zhvilluan diskutime në nivel teknik me përfaqësues qeveritarë dhe operatorët e sistemeve për gaz dhe energji elektrike. U theksua bashkëpunimi i shkëlqyer mes operatorëve të sistemeve të katër vendeve, me kërkesën shtesë që të intensifikohen kontaktet dhe të thellohet bashkëpunimi i tyre në periudhën e ardhshme.

Shkup - Komisioni për sëmundje infektive ka mbajtur mbledhje me qëllim shqyrtimin e situatës lidhur me paraqitjen e një klasteri me hantavirus – varianti Andes në nivel global dhe ka vlerësuar se në vendin tonë rreziku për paraqitjen dhe përhapjen e virusit është i ulët, ndërsa sistemi shëndetësor është i përgatitur në përballjen e paraqitjes eventuale të infeksionit, bën të ditur Ministria e Shëndetësisë. Instituti i Shëndetit Publik, siç theksojnë prej atje, disponon reagentë për vërtetimin laboratorik të virusit, si dhe procedura standarde operative për diagnostikimin e këtij virusi.

Shkup - Një shofer 20-vjeçar nga Shkupi është privuar nga liria, për shkak se me automjet ka goditur një motoçikletë të drejtuar nga një 13-vjeçar, njoftoi MPB. Në SPB Shkup dje në orën 16:10 u njoftua se në rrugën "Koce Metalec" në Shkup, automjeti i udhëtarëve „Seat“ me targa të Shkupit, i drejtuar nga A.P. (20) nga Shkupi, ka goditur një biçikletë të drejtuar nga një 13-vjeçar nga Shkupi.

Prishtinë, 15 maj 2026 (MIA) - Ushtruesja e detyrës së presidentes së Republikës së Kosovës, Albulena Haxhiu, ka pritur sot në takim komisioneren e Bashkimit Evropian për Zgjerim, Marta Kos, në vizitën e saj të parë zyrtare në Kosovë, njoftoi Zyra e Presidentes së Republikës së Kosovës (ZPRK). "Biseduam për rrugën evropiane të Republikës së Kosovës, për reformat që duhet të çohen përpara dhe për rëndësinë që procesi i zgjerimit të jetë i drejtë, i besueshëm dhe i bazuar në merita", ka theksuar Haxhiu.

Uashington - Drejtori i Agjencisë Qendrore të Inteligjencës Amerikane (CIA), Xhon Ratklif, udhëtoi për në Havanë, ku përfaqësuesve kubanë do t'u përcjellë një mesazh nga Presidenti Donald Tramp se Uashingtoni do të përfshihet në dialog ekonomik dhe të sigurisë nëse ka "ndryshime themelore". Një zyrtar i paidentifikuar i CIA-s nuk shpjegoi më shumë për reformat e kërkuara nga Trampi, i cili vazhdimisht kërcënohet se do të "kujdeset" për Kubën që kur ushtria amerikane në janar e kapi Presidentin venezuelan Nikolas Maduro, një aleat i Havanës.

Laredo - Gjashtë emigrantë, mes të cilëve edhe një djalë 14-vjeçar, u gjetën të vdekur në një vagon mallrash të një treni në Laredo të Teksasit, kumtuan autoritetet lokale.  Tre nga viktimat janë shtetas të Meksikës, ndërsa tre të tjerët besohet se janë nga Hondurasi. Shefi i policisë së Laredos, Migel Rodrigez, deklaroi se autoritetet besojnë se migrantët janë viktima të një operacioni kontrabande njerëzish dhe shtoi se autoritetet federale po vazhdojnë hetimin e tyre. 

Kinshasa - Qendra afrikane për kontroll dhe parandalim nga sëmundjet (CDC) sot njoftoi se në provincën Ituri në Republikën Dominikane Kongo është konfirmuar epidemia e ebolës.  Për shkak të shpërthimit të epidemisë CDC thirri takim urgjent. CDC theksoi se është i shqetësuar për shkak të rrezikut nga përhapja e mëtutjeshme për shkak të mjedisit urban Bunija dhe Rvampara, lëvizjes së madhe të popullsisë dhe lëvizshmëria në lidhje me aktivitetet në miniera në Mongbvallu. 

Shkup - Moti sot do të jetë me vranësira të ndryshueshme me periudha me diell, ndërsa pasdite dhe gjatë natës do të ketë kushte për paraqitje lokale të jostabilitetit me reshje të rrëmbyeshme shiu dhe bubullima.  Siç informojnë nga Drejtoria për Punë Hidrometeorologjike (DPHM), do të fryjë erë e lehtë deri mesatare nga drejtimi i ndryshueshëm, ndërsa temperatura maksimale do të lëvizë nga 19 deri në 26 gradë.