Од верските календари 

6 мај 2024 (МИА)

Според календарот на МПЦ (Јулијанскиот календар) денеска е 23 април.

Денеска е Воскресение Христово - Втор ден.         

Велигден, или празникот на Христовото воскресение е дефинитивно најголемиот христијански празник. Страдалната седмица заврши со новиот ден денот на воскресението. Ние сме свикнале да ја делиме неделата на седум дена. Но, денес се установува тајната на осмиот ден, т.е. идниот ден, кој треба да дојде за никогаш да не заврши како што завршува секој ден на ова наше време. Христовото станување од мртвите е потврда на сите негови зборови, на сите негови ветувања. Подоцна апостол Павле ќе зборува: Ако Христос не воскреснеше, ќе беше залудна вашата вера, ќе беа залудни вашите надежи, зашто ќе верувавте и ќе се надевавте напразно. И навистина е така, бидејќи Христос не ветуваше привремена поправка на нашите животни услови, како што ветува на пример некој политичар, економист, кој ги проучил космичките закони па вешто се раководи според нив, туку ветуваше една сосема нова реалност, како креатор кој е моќен и способен да ја создаде таа реалност, поинаку кажано, како господар над животот и смртта. Утрото на третиот ден од Христовата смрт до неговиот гроб дојдоа прво жените мироносици и ја најдоа тргната плочата што го затвораше гробот. Внатре во гробот сретнаа еден пресветол ангел кој им ја кажа веста за Христовото воскресение. Оваа вест оттогаш секоја година ја објавува Црквата низ целиот свет, како најрадосна вест за целиот човечки род.

ОД КАТОЛИЧКИОТ КАЛЕНДАР

Блажена Катерина Тројани

Денешниот славеник е блажената Катерина Тројани, италијанска калуѓерка и основач на фрањевските мисионери. Ќерка на богати родители, таа е родена на 19 јануари 1813 година во малиот град Џулијано ди Рома (провинција Фросиноне, Лацио) како Костанца Тројани. Почина во Каиро на денешен ден, 6 мај 1887 година. Ја оплакуваа и христијаните и муслиманите, особено црните деца на кои особено и беа приврзани. Таа беше прогласена за блажена во 1985 година од папата Јован Павле Втори. Нејзиното друштво сè уште успешно работи во Европа, Африка, Азија, Латинска и Северна Америка, со околу 700 калуѓерки во 88 манастири.

###