Македонска Каменица, 8 октомври 2025 (МИА) – Независниот кандидат за градоначалник на Македонска Каменица, Миран Митревски, во рамки на својата изборна програма ја претстави иницијативата за изградба на патна врска меѓу Македонска Каменица и Крива Паланка преку Осоговските Планини.

Митревски посочи дека, иако двете општини се соседни, тие сè уште немаат директна патна комуникација, па граѓаните се принудени да патуваат по подолга и неекономична рута преку Кочани, Пробиштип и Кратово.

– Веќе постои изработен проект за патно поврзување кој ќе претставува најкратка и најприродна врска преку Осоговските Планини. Со негова реализација ќе се овозможи побрз економски, туристички и културен развој, не само на двете општини, туку и на околните рурални средини, изјави Митревски.

Тој нагласи дека со изградбата на патот ќе се заживее планинскиот и руралниот туризам, ќе се поттикне развој на локалниот бизнис, сместувачки капацитети и угостителство, како и отворање нови можности за вработување на младите.

Како посебно значајни придобивки, кандидатот ги истакна скратувањето на растојанието и времето на патување меѓу источниот и североисточниот регион, зајакнувањето на меѓуопштинската соработка и олеснет пристап на населението до институции, пазари и здравствени услуги.

– Поврзувањето преку Осоговските Планини не е само пат – тоа е мост кон нова иднина, економски напредок и подобар квалитет на живот“, порача Митревски.вс/ар

Фото: Миран Митревски, кандидат за градоначалник на Македонска Каменица