Gjenevë, 23 janar 2026 (MIA) - Komisari i lartë i Kombeve të Bashkuara për të Drejtat e Njeriut, Volker Tirk, sot në një seancë urgjente të Këshillit të të Drejtave të Njeriut të KB-së në Gjenevë, u bëri thirrje autoriteteve iraniane që të ndalojnë shtypjen e pjesëmarrësve në protestat antiqeveritare.

Tirk deklaroi se mijëra njerëz, përfshirë fëmijë, janë vrarë në atë që ai e quajti "shtypje brutale" e demonstratave antiqeveritare nga autoritetet iraniane. "U bëj thirrje autoriteteve iraniane që të rishqyrtojnë vendimin e tyre, të tërhiqen dhe të ndalojnë shtypjen brutale", tha Tirk.

Ai e vlerësoi shtypjen si "një model nënshtrimi dhe përdorimi të tepruar të forcës, i cili nuk mund ta zgjidhë kurrë pakënaqësinë dhe frustrimet e popullit".

Aktivistët thonë se numri i të vrarëve në shtypjen e protestave në të gjithë Iranin ka arritur të paktën në 5.002, me frikë se numri i vërtetë është më i lartë, veçanërisht për shkak të mbylljes së internetit në vend që ka zgjatur më shumë se dy javë.

Sipas të dhënave të organizatës "Aktivistë për të Drejta të Njeriut", të vrarë janë rreth 4.716 protestues, 203 zyrtarë qeveritarë, 43 fëmijë dhe 40 civilë që nuk ishin të përfshirë në protesta. Grupi bëri të ditur se më shumë se 26.800 persona janë ndaluar në një fushatë arrestimesh masive.

Autoritetet iraniane më 8 janar ndërprenë pothuajse plotësisht aksesin në internet dhe komunikimet ndërkombëtare, duke e bërë të vështirë verifikimin e informacionit nga vendi.

Qeveria iraniane të mërkurën njoftoi se 3.117 persona kishin vdekur në trazira, përfshirë civilë, forca sigurie dhe ata që i quajti "terroristë". mb/

Foto: EPA