Antoniu: Ekipi qipriot nga Maqedonia e Veriut u largua me përshtypje pozitive
- U larguam nga Maqedonia e Veriut me ndjenja pozitive, patëm bashkëpunim të shkëlqyeshëm, jemi të kënaqur që ndihmuam dhe ishim të dobishëm për njerëzit, theksoi Andreas Antoniu, shef dhe koordinator i misionit qipriot që mori pjesë në shuarjen e zjarreve tek ne, dhe në të njëjtën kohë shprehu shpresën se atmosfera e krijuar pozitive do të kontribuojë në përmirësimin e marrëdhënieve ndërmjet dy vendeve, njoftoi korrespondenti i MIA-s nga Athina.
![Antoniu: Ekipi qipriot nga Maqedonia e Veriut u largua me përshtypje pozitive](https://mia.mk/index.php/images/20240821141230_big_730x400_65.webp )
Nikozi, 21 gusht 2024 (MIA) - U larguam nga Maqedonia e Veriut me ndjenja pozitive, patëm bashkëpunim të shkëlqyeshëm, jemi të kënaqur që ndihmuam dhe ishim të dobishëm për njerëzit, theksoi Andreas Antoniu, shef dhe koordinator i misionit qipriot që mori pjesë në shuarjen e zjarreve tek ne, dhe në të njëjtën kohë shprehu shpresën se atmosfera e krijuar pozitive do të kontribuojë në përmirësimin e marrëdhënieve ndërmjet dy vendeve, njoftoi korrespondenti i MIA-s nga Athina.
Në periudhën prej 7 deri më 14 gusht, dy avionë të tipit “Air tractor” me katër anëtarë ekuipazhi dhe pesë personel mbështetës tokësor nga Qiproja, në kuadër të asistencës nga mekanizmi i BE-së për mbrojtjen civile, morën pjesë në përballjen me zjarrin në Maqedoninë e Veriut.
Duke folur për agjencinë qipriote të lajmeve KIPE dhe duke përcjellë përshtypjet e përvojës së zjarrfikësve nga Qiproja në lokacione të ndryshme në vendin tonë, Antoniu vlerësoi se "ndryshimet klimatike e gjetën Maqedoninë e Veriut të papërgatitur për t'u përballur me shpërthimin e zjarreve", por edhe se ndihma nga Qiproja u prit pozitivisht.
“Ne patëm ndjenjën se ata e vlerësuan punën tonë. Jemi të lumtur që ndihmuam, jemi të kënaqur që ishim të dobishëm për njerëzit”, theksoi Antoniu, duke shprehur shpresën se misioni dhe atmosfera pozitive e krijuar do të kontribuojnë në përmirësimin e marrëdhënieve midis Qipros dhe Maqedonisë së Veriut.
Ai theksoi se fakti që “takuam njerëz që e vlerësojnë në mënyrë të paimagjinueshme kontributin tonë” shkaktoi kënaqësi dhe inkurajoi misionin qipriot, dhe si shembull i pritjes së mirë, ai përmendi rastin me një shofer taksie që po transportonte pjesëtarë të ekipit të qipriotëve dhe kur i thanë se në Maqedoninë e Veriut janë për shuarjen e zjarreve, ai refuzoi t'u merrte para.
Kur agjencia qipriote e lajmeve theksoi se "kontributi i Republikës së Qipros në shuarjen e zjarreve u prezantua gjerësisht nga mediat në Maqedoninë e Veriut", Antoniu përmendi gjithashtu se në gjysmë të operacionit të misionit qipriot, anëtarët u vizituan nga Ministri i Punëve të Brendshme, ndërsa pas përfundimit dhe para largimit, drejtori i QMK-së Stojançe Angelov u takua me delegacionin dhe u ndau diploma nderi anëtarëve për kontributin e tyre në përpjekjet për përballimin e zjarreve.
Duke folur për KIPE, shefi i delegacionit iu referua edhe rrugëtimit të gjatë nga Qiproja në Shkup, shpjegoi se pas marrjes së mesazhit nga Mekanizmi i Mbrojtjes Civile të BE-së më 6 gusht, menjëherë filluan përgatitjet për misionin, anëtarët u nisën të nesërmen për në Maqedoninë e Veriut, dhe ata ishin në Shkup më 8 gusht në orën një të mëngjesit, por “megjithë rrugëtimin e vështirë ata ishin gati të ndërhynin në orët e para të agimit”.
Antoniu sqaroi se misioni filloi në dy faza, fillimisht u nisën dy avion, njëri që mbante pajisjet mbështetëse dhe tjetri me një pilot dhe ekuipazhin, ndërsa në fazën e dytë u nisën gjashtë anëtarët e tjerë, të cilët udhëtuan me fluturime komerciale nëpërmjet Athinës dhe Zagrebit dhe më pas mbërritën në Shkup.
Duke iu referuar zjarreve në Maqedoninë e Veriut, ai tha se ato ishin të përmasave të mëdha, “e pamë pronën të shndërrohej në hi” dhe se ata ndërhynë në zona ku zjarri ishte një kërcënim i drejtpërdrejtë për pronën dhe jetën e njerëzve.
“Ditën e parë na njoftuan se ka pasur 38 zjarre, në një vend dy herë e gjysmë më të madh se Qiproja”, theksoi Antoniu dhe shtoi se zjarret shkaktuan një katastrofë të madhe mjedisore, por gjithashtu patën ndikim të drejtpërdrejtë në jetët e njerëzve.
Ai tha se ditën e parë kanë ndërhyrë në zonën ku ka një manastir dhe e kanë mbrojtur atë, ditën e parafundit në një park që u dogj për 23 ditë, ndërsa ditën e fundit intervenimet kanë qenë në dy pika të reja, në lindje të Shkupit afër kufirit me Bullgarinë, dhe i dyti afër kufirit me Shqipërinë, dhe të dy frontet, sipas Antoniu, ishin pranë zonave të banuara dhe ekzistonte rreziku i shtuar që zjarri të përhapej dhe të rrezikonte njerëzit.
Ai vuri në dukje se zjarrfikësit qipriotë ndërhynë në një mjedis krejtësisht të ndryshëm nga ai i Qipros.
“Këto ishin zona të mëdha, zona të paprekura në të cilat është shumë e vështirë të operojnë forcat tokësore, prandaj e vetmja zgjidhje që mund të ofrohej ishte nga ajri”, shtoi ai.
Në të njëjtën kohë, ai theksoi se “është trishtuese të shohësh humbjen e pyjeve dhe shkatërrimin e natyrës, për shkak të neglizhencës, pakujdesisë dhe/ose qëllimit tonë”, duke shtuar se “të gjithë duhet ta kuptojmë se duke mbrojtur mjedisin në të cilin ne jetojmë, mbrojmë dhe jetën tonë."
Lidhur me përvojën operative të fituar në vendin tonë, Antoniu theksoi se në Maqedoninë e Veriut forcat zjarrfikëse nuk kanë ekspertizën që Sektori i Pyjeve Qipriot ka zhvilluar gjatë dekadave, si në aspektin e shuarjes së zjarreve në pyje nga toka dhe nga ajri, duke theksuar se ato operojnë me shpejtësi të madhe dhe se misioni i Qipros ndihmoi në përmirësimin e kohës së grupeve të tjera, përfshirë avionët nga Gjermania, si në kohëzgjatjen e shuarjes ashtu edhe në kohën e karburantit të pajisjeve të zjarrfikësve ajrore.
Në të njëjtën kohë, ai theksoi se zjarrfikësit qipriotë u përpoqën të gjenin shkumë dhe material zjarrfikës për të ngadalësuar ose ndaluar përhapjen që do të rriste efikasitetin operacional dhe efektivitetin e shuarjes së zjarrit, por përpjekjet ishin të pasuksesshme.
Për Sektorin e Pyjeve në varësi të Ministrisë së Bujqësisë, Zhvillimit Rural dhe Mjedisit të Republikës së Qipros, Antoniu shpjegoi se ai ka më shumë se një shekull përvojë dhe njohuri në shuarjen e zjarrit dhe për sa i përket shuarjes së zjarrit nga ajri, njësia e aviacionit të këtij sektori mund të jetë ndër "njësitë më të mira të zjarrfikësve ajrore në botë", duke shpjeguar se kjo bazohet në përvojën e pilotëve nga e gjithë bota që nënshkruajnë kontratë me sektorin dhe drejtojnë avionin.
Dy pilotët që u përfshinë në misionin në Maqedoninë e Veriut janë nga Australia dhe inxhinieri nga Zelanda e Re.
Video: Agjencia qipriote e lajmeve (KIPE)