Самит на Македонија2025 во Скопје
- Невладината Македонија2025 денеска и утре во Скопје ќе го одржи 11-тиот Самит на кој ќе се обратат околу 40 говорници меѓу кои и премиерот Димитар Ковачевски и неговата српска колешка Ана Брн
![Самит на Македонија2025 во Скопје](https://mia.mk/index.php/images/20221113134651_big_730x400_9.webp )
Скопје, 18 мај 2022 (МИА) – Невладината „Македонија2025“ денеска и утре во Скопје ќе го одржи 11-тиот Самит на кој ќе се обратат околу 40 говорници меѓу кои и премиерот Димитар Ковачевски и неговата српска колешка Ана Брнабиќ кои ќе учествуваат на панелот „Градење на просперитетна иднина: Улогата на регионалната соработка“.
Според организаторот, фокусот на Самитот ќе биде кон се она што може да се направи за да се избегнат кризите и да станеме попродуктивни и со тоа да се подобри животниот стандард на граѓаните и деловното опкружување за бизнисите.
-Самитот почнува со економски теми и со разгледување на тековните проблеми и она што се случува во Западен Балкан, а потоа ќе поминеме на темите за кои мислиме дека ќе донесат подобра иднина. Сакаме да покажеме и успешни приказни од бизниси од Македонија и од регионот. Очекуваме околу 40 говорници и околу 400 гости. Главната тема на самитот е поврзана со дигитализацијата и технологиите и како тие носат кон компании, работна сила и администрација на иднината, односно како може да помогнат да станеме поефикасни и попродуктивни и да се подобри животниот стандард, изјави Никица Мојсоска Блажевски, главен извршен директор на „Македонија2025“.
И годинава, на самитот ќе учествуваат креатори на политики, лидери на компании, членови на дипломатскиот кор и на меѓународни организации и претставници на академската и граѓанската заедница. Ќе доминираат говорници од Западен Балкан и Југоисточна Европа, како и претставници од македонската дијаспора, главно од САД и Канада.
На Самитот ќе се дискутираат актуелни теми, како што се дигитализацијата, развојот на технологијата, важноста на лидерството, градењето на глобални брендови, дигиталните општества, работните места и човечкиот капитал, како и „блок-чеин“ технологиите. вј/мд/