Најмалку 30 загинати во израелски напад во централна Газа
- Бројот на загинати Палестинци во денешниот израелски воздушен напад врз училиште во Деир ал Балах во централниот дел на Појасот Газа се искачи на најмалку 30, а повеќе од 100 лица се повредени, соопштија палестинските здравствени власти.
![Најмалку 30 загинати во израелски напад во централна Газа](https://mia.mk/index.php/images/20240727162005_big_730x400_86.webp )
Газа, 27 јули 2024 (МИА) – Бројот на загинати Палестинци во денешниот израелски воздушен напад врз училиште во Деир ал Балах во централниот дел на Појасот Газа се искачи на најмалку 30, а повеќе од 100 лица се повредени, соопштија палестинските здравствени власти.
Претходно беше соопштено дека повеќе од 24 Палестинци, меѓу кои и деца и жени, се убиени во нападот на училиштето во кое се сместени голем број раселени лица.
Официјални лица најавија дека бројот на загинати би можел да биде поголем, бидејќи операциите за пребарување и спасување сè уште се во тек.
Во соопштението на израелската војска (ИДФ) се наведува дека цел на нападот бил „команден и контролен центар на Хамас во училишниот комплекс Кадија во центарот на Газа“.
Во соопштението се тврди дека училиштето „се користи за напади врз војници и како складиште за оружје. ИДФ исто така наведува дека ги „предупредувала цивилите“ пред нападот.
Претходно денеска, во бегалскиот камп Ал-Бурејџ, пет Палестинци беа убиени во израелски воздушен напад врз куќа, додека уште четворица беа убиени во друг напад на куќа во Рафа, во близина на границата со Египет. јт/
Фото: ЕПА