12 ноември 2024

Македонска Каменица - По вчерашните и синоќешните врнежи од снег, екипи ангажирани од општина Македонска Каменица и екипите на Јавното претпријатие „Камена Река“ се на терен и успешно ги вршат активностите за расчистување на снежните наноси. Сите локални патишта, вклучително и оние што водат до најоддалечените и највисоките населени места во општината, се проодни и расчистени. 

- Екипите, од раните утрински часови се на терен во Караџевско маало во село Косевица, Капетанско маало во село Саса и повеќе од повисоките населени места во село Цера, каде со максимална ангажираност вложуваат напори за обезбедување на безбеден и непречен сообраќај. Со постојана присутност на екипите на терен, ќе овозможиме брзо и ефикасно расчистување на сите локални патишта во услови на интензивни врнежи и ниски температури во текот на целиот зимски период, истакнал градоначалникот Димчо Атансовски, соопштија денеска од Општината. Атансовски апелирал до граѓаните за внимателност при движењето, особено на одредени делови каде што е можно присуство на мраз.

Скопје - И оваа година Општина Илинден ги вклучува граѓаните во креирањето на Буџетот за наредната година, такашто од денеска 12.11.2024 година до 29 ноември 2024 година ќе се реализира процесот на изработка на новиот Буџет за 2025 година.

Како што соопштија од Општината, врвен приоритет е транспарентно и одговорно работење во служба на граѓаните.

Крива Паланка - Староградското друштво „Распеани паланчани“ синоќа одржа концерт на староградски кривопаланечки песни во Градскиот музеј Крива Паланка. На концертот беа изведени незаборавните староградски песни инспирирани од кривопаланечката традиција и историја, од вистински настани и личности кои го претставуваат индентитетот и духот на градот.

Настапот на познатото староградско друштво предизвика голем интерес кај публиката, која посведочи за носталгијата за минатите времиња и елегичноста на староградскиот мелос, што будат чувства за некогашниот културен живот и личностите кои оставиле неизбришливи траги во кривопаланечката историја.

Василево - Општина Василево вечер ќе ја одржи првата форумска сесија во рамките на проектот „Зајакнување на општинските совети-фаза 2“ и затоа ги поканува граѓаните активно да се вклучат во форумските сесии и да учествуваат во изборот на проектите кои ќе бидат реализирани.

-Во рамките на предвидените форумски сесии граѓаните ќе дискутираaт за проблеми кои ги засегаат и ќе нудат решенија од кои ќе произлезат проектни идеи и концепти за предлог проекти. Од овие идеи и концепти за проекти учесниците на форумот ќе ги изберат оние кои ќе бидат реализирани од проектниот фонд. На последната сесија, граѓаните ќе бидат информирани за реализацијата на избраниот или избраните проекти и за препораките. Темата за која ќе се подготвуваат проекти ќе ја изберат граѓаните на првата форумска сесија, информираа од локалната самоуправа.