До 15 април е осигурено снабдувањето со природен гас, тврди Бектеши
- До 15 април е осигурено снабдувањето со природен гас во земјава, изјави денеска министерот за економија Крешник Бектеши, кој не верува дека би имале некаков проблем во делот на топлинската и
![До 15 април е осигурено снабдувањето со природен гас, тврди Бектеши](https://mia.mk/index.php/images/20221112162930_big_730x400_5.webp )
Скопје, 1 април 2022 (МИА) - До 15 април е осигурено снабдувањето со природен гас во земјава, изјави денеска министерот за економија Крешник Бектеши, кој не верува дека би имале некаков проблем во делот на топлинската и електричната енергија при евентуална одлука на Руската Федерација да се плаќа природниот гас во рубљи од страна на „непријателските држави“.
- Во случај да се донесе таква одлука, сите други алтернативни ресурси на природен гас со кои ќе се снабдува Бугарија, ќе може да ги користиме и ние, рече Бектеши, одговарајќи на новинарски прашања по денешната прес-конференција во Владата.
Бектеши рече дека како членка на НАТО и земја која има аспирации за влез во Европската Унија, државата ќе ги почитува сите одлуки што ќе бидат донесени на ниво на Алијансата и од страна на државите членки на ЕУ, но убеден е дека ќе се изнајдат други алтернативи за снабдување со природен гас. На дел од нив, како што посочи, веќе како држава работиме, а тоа се новиот интерконектор со Грција, директното учество во Александропулос и интерконекторот со Бугарија.
Бектеши рече дека утринава разговарал и со гувернерката на Народната банка и дека се уште нема насока од Европската централна банка бидејќи во нашата курсна листа ја нема рубљата како валута и не може да се прават такви трансакции.
Во однос на лиценцата на БЕГ и дали таа ќе биде одземена по потфрлањето на оваа компанија во екот на грејната сезона, Бектеши рече дека тоа не е надлежност на Министерствто за економија, но доколку по завршување на договорот меѓу ЕСМ и БЕГ, не се исполнуваат условите, тогаш сигурно ќе се постапи според законските прописи. бак/са/