Бостон, 18 февруари 2025 (МИА) - Учесниците во демонстрациите против американскиот претседател Доналд Трамп и неговата политика се спротивставија на ниските температури ширум САД на митинзи организирани по повод празникот Денот на претседателите.

Организаторот „Движење 50501“ ги нарече демонстрациите „Без кралеви на денот на претседателите“, а тие се одржаа во услови на поларен циклон во кој вчера загинаа 10 луѓе, а сега се движи кон запад, носејќи температури кои според метеоролозите се „опасни по живот“.

Демонстрациите се одржаа помалку од две недели по слични протести низ целата земја во десетици американски градови.

Цел на двата протести беа Трамп и неговиот советник, милијардерот Илон Маск, кој го предводи новиот Оддел за владина ефикасност (DOGE) на Трамп. Тоа е надворешна владина организација, дизајнирана да ги намали федералните трошоци.

Речиси 1.000 луѓе маршираа низ снегот во Бостон, извикувајќи „Илон Маск мора да си оди“ и „Нема кралеви на Денот на претседателите!“.

Демонстрантите во Бостон, носеа натписи на кои пишуваше: „Ова е државен удар“ и „Кукавици му се поклонуваат на Трамп, патриоти станете“.

Организаторите на протестите во главните градови на државите и големите градови, вклучувајќи ги Вашингтон, Орландо, Флорида и Сиетл, рекоа дека протестираат против „антидемократските и незаконски дејствија на администрацијата на Трамп и нејзините плутократски сојузници“.

На еден знак на митингот во Вашингтон пишуваше: „Депортирајте го Маск, симнете го Трамп од тронот“.

Собирите следеа по серија извршни наредби на Трамп, само неколку дена откако почнаа масовните отпуштања во федералните агенции. зш/