Скопје, 30 јануари 2025 (МИА) - Бордот на европски студенти по технологија - Скопје (БЕСТ - Скопје) информира дека во тек е пријавувањето за Хакатон 2025 - дводневен натпревар каде студентите можат да ја покажат својата креативност и технички способности преку работење на проекти и решавање на проблеми од сферите на веб развивање, програмирање, вештачка интелигенција, PR, маркетинг и дизајн.

Хакатон 2025 е организиран од БЕСТ Скопје и ќе се одвива во Startup Club Skopje, од 22 февруари до 23 февруари 2025 година. 

Краен рок за пријавување е 6 февруари 2025 година. Сите заинтересирани можат да се пријават како тим (од три до пет лица) на https://hackathon25.best.org.mk/ или да се пријават индивидуално, а потоа организаторот ќе ги вклучи во тим кој одговара на нивните интереси и вештини.

- Ќе работите на вистински проблем зададен од партнерот за овој Хакатон - Startup Club Skopje за обновување на нивната веб-страница srekja.mk. Секој тим има слобода на креативност и флексибилност за кои програмски јазици и алатки ќе ги користи за ребрендирање и градење на страницата. За да учествуваш на Хакатонот, не ти се потребни многу предзнаења – сѐ што ти треба е желба за стекнување на нови вештини, тимски дух и страст за технологија, се вели во соопштението.

Учесниците ќе имаат можност да се запознаат и да соработуваат со претставници од Startup Club Skopje, победниците на поранешните хакатони и други експерти кои ќе бидат ментори за време на целиот настан. Предвидени се награди за најдобрите учесници. мд/лв/

Фото: Фејсбук