Shkup, 22 dhjetor 2024 (MIA) - Nuk do të spekuloja nëse ish-zëvendëskryeministri Artan Grubi është në Shqipëri apo Kosovë, por fakt është se ai nuk ishte i pastër si loti. Nëse do të ishte i pastër si loti, nuk do të kishte nevojë të ishte i arratisur nga drejtësia, por do të vinte këtu dhe do të mbronte pafajësinë e tij, tha kryeministri Hristijan Mickoski.

Ai sot gjatë vizitës së tij në Gjevgjeli, duke iu përgjigjur pyetjes së një gazetari, ka theksuar se mendon se mesazhet e dërguara nga LSDM dhe BDI nuk janë mesazhe në drejtim të luftës vendimtare kundër krimit dhe korrupsionit.

Mickoski theksoi se koalicioni LSDM dhe BDI ishte mbrojtës jo vetëm i kriminelëve politikë, por edhe i kriminelëve të vërtetë.

"Mesazhet që po i dërgohen publikut për arratisjen e Grubit nuk janë mesazhe në drejtim të një lufte vendimtare kundër krimit dhe korrupsionit. Ne kemi paralajmëruar për këtë shumë herë në të kaluarën. Ky koalicion që funksionoi ishte vërtet një mbrojtës i madh, jo vetëm i kriminelëve politikë, por edhe i kriminelëve të vërtetë", tha Mickoski.

Ai nënvizoi se MPB-ja, Byroja për Siguri Publike dhe SPB Shkup po punojnë në drejtim të shkatërrimit të një grupi kriminal në zonën e qytetit të Shkupit, i cili vite më parë ishte i paprekshëm për këto institucione.

“Jemi dëshmitarë të një aksioni të fuqishëm të MPB-së, Byrosë për Siguri Publike dhe SPB Shkup, në drejtim të shpërbërjes së një grupi kriminal në zonën e qytetit, i cili vite më parë ishte i paprekshëm për këto institucione. Por ajo që bënë këto institucione është jashtëzakonisht domethënëse, sepse vetëm dy ditë më parë u gjetën rreth 200 gram eksploziv, të cilat mjaftojnë për të hedhur në erë çfarëdo ndërtesë më të madhe të Qeverisë, Kuvendit", tha Mickoski.

Paralajmëroi se do të vazhdojnë në betejën kundër çrenjosjes së strukturave kriminale, por edhe për të kërkuar llogari nga kriminelët politikë.

"Me këtë qeveri qytetarët mund të jenë të sigurt. Ne vazhdojmë në betejën tonë të vendosur kundër çrenjosjes së këtij lloji të strukturave kriminale, por edhe të kërkojmë llogari nga kriminelët politikë që kanë rrënuar Maqedoninë në shtatë vitet e fundit. U bëj thirrje qytetarëve që të jenë të qetë dhe të dinë se kjo Qeveri kujdeset për gjithçka që duhet të garantojë sigurinë e tyre", tha Mickoski. ls/

Foto: Printskrin