15:00/28 mars/2025

Shkup - Mesazhi i Planit të rritjes është shumë i qartë - është një ofertë gjithëpërfshirëse e Bashkimit Evropian për Ballkanin Perëndimor për nxitjen e kushteve socio-ekonomike që hapin një faqe të re në marrëdhëniet tona. Ai përfshin një sërë masash që ofrojnë qasje progresive në tregun e përbashkët të BE-së, në tregun e përbashkët rajonal, si dhe mekanizma për të nxitur reformat. Agjenda reformuese e Planit të rritjes është një mundësi për vendin për të përshpejtuar përfitimet kryesore të anëtarësimit në BE, si dhe të rrisë konvergjencën ekonomike përpara inkuadrimit.

Shkup - Pas paralajmërimit të liderit të LSDM-së, Venko Filipçe, se javën e ardhshme në Kuvend do të iniciojë takim të liderëve pas zjarrit në Koçan, sot nga Qeveria thonë se nuk kanë marrë asnjë kërkesë, aq më pak iniciativë zyrtare nga LSDM-ja, por se Qeveria dhe kryeministri janë të hapur për çdo propozim dhe iniciativë që ka për qëllim të ndihmojë. "Nuk ka arritur kërkesë zyrtare deri tek Qeveria, as nuk ka iniciativë nga LSDM-ja. Janë vërejtur vetëm paralajmërime në media. Situata të tilla serioze kërkojnë qasje serioze. Qeveria dhe kryeministri janë të hapur për çdo propozim dhe iniciativë, e cila ka për qëllim të ndihmojë", thonë nga Qeveria për MIA-n

Shkup - Dinamika e zbatimit të agjendës së reformave nga Plani për Rritje për vendin është e mirë, por jo e mjaftueshme, vlerësoi ministri për Çështje Evropiane Orhan Murtezani në prezantimin e sotëm të masave nga Plani i Rritjes për Ballkanin Perëndimor dhe Agjenda e Reformave 2024-2027 për Maqedoninë e Veriut në konferencën e përbashkët për shtyp në Qendrën për media të qeverisë me shefin e delegacionit të Bashkimit Evropian në Shkup, Mihalis Rokas. Murtezani në përgjigje të pyetjes së një gazetari theksoi se sipas agjendës së reformave të miratuar në Bruksel, për të gjitha reformat që nuk zbatohen brenda afatit të caktuar, hyn në fuqi një periudhë automatike grejs prej 12 muajsh, por theksoi se kjo nuk duhet të jetë rrethanë lehtësuese për ne, sepse për çdo periudhë ka reforma shtesë dhe nëse nuk do t'i zbatojmë më kohë ato do të mblidhen, që në fund do të nënkuptonte, thotë, se ne nuk do t'i realizojmë me sukses.

Shkup - SPB Shkup njofton qytetarët se të dielën, duke filluar në orën 10:00, për shkak të mbajtjes së garës së atletikës, me trasë lëvizjeje nga parkingu i poshtëm në Vodno të Mesme përgjatë rrugës rajonale (R2138) deri te parkingu i manastirit Sh. Pantelejmon dhe anasjelltas, Njësia për siguri në qarkullimin rrugor do të marrë masa për regjim të veçantë të komunikacionit, me ç’rast komunikacioni do të ridrejtohet në rrugët përreth. Nga SPB Shkup u bëjnë apel të gjithë qytetarëve pjesëmarrës në komunikacion që të respektojnë urdhrat e dhëna nga nëpunësit policorë.

Shkup - Unitetin në Ushtri dhe unitetin në Aleancë ta kthejmë në unitet mes qytetarëve dhe të ndërtojmë një shoqëri që do të zhvillohet në të gjitha aspektet dhe do t'i përshtatet sfidave të reja me një qëllim, një jetë më të mirë dhe më të sigurt për të gjithë qytetarët, rekomandoi Ministri i Mbrojtjes Vllado Misjallovski, në eventin që u mbajt sot në kazermën “Ilinden” në Shkup, me rastin e 5 vjetorit të anëtarësimit të Republikës së Maqedonisë së Veriut në Aleancën e NATO-s. Misajlovski, duke iu referuar tragjedisë së fundit me zjarrin në Koçan, theksoi se po jetojmë në periudhën më të vështirë që nga pavarësia jonë dhe se sot jo vetëm që do ta shënojmë këtë përvjetor, por do të festojmë edhe bashkimin dhe mbështetjen e ndërsjellë.

Shkup - Investimi ynë në Aleancë është në të njëjtën kohë investim në Armatë, në mburojën e integritetit territorial dhe pavarësisë së Republikës sonë, tha Presidentja dhe Komandantja Supreme e Armatësi Armatës, Gordana Siljanovska Davkova, në eventin që u mbajt sot në kazermën “Ilinden” në Shkup, me rastin e 5 vjetorit të anëtarësimit të Republikës së Maqedonisë së Veriut në Aleancën e NATO-s. Siljanovska Davkova theksoi se si shtet duhet të investojmë në mbrojtjen dhe sigurinë e Maqedonisë. Ai njoftoi se do të vazhdojmë të kontribuojmë për paqen përmes pjesëmarrjes në misionet paqeruajtëse të udhëhequra nga NATO dhe Kombet e Bashkuara, si dhe se do të respektojmë standardet e NATO-s dhe politikën e përbashkët të sigurisë dhe mbrojtjes të Bashkimit Evropian.

Shkup - Resurset e kufizuara financiare, mbështetja e pamjaftueshme politike dhe pengesat administrative mbeten faktorët kyç që ngadalësojnë zbatimin e Strategjisë kombëtare për parandalimin e korrupsionit dhe konfliktit të interesit, theksoi Tatjana Dimitrovska, kryetare e Komisionit Shtetëror për Parandalimin e Korrupsionit (KSHPK). Në seancën e sotme publike të KSHPK-së, Dimitrovska theksoi se nga gjithsej 154 aktivitete për vitin 2024, vetëm 18 për qind janë realizuar tërësisht, 32 për qind janë në proces të realizimit, ndërsa 50 për qind nga aktivitetet mbeten të parealizuara. 

Shkup - Komandanti i komandës së bashkuar të forcave aleate në Napoli, admirali Stjuart Manç sot në kazermën Ilinden mbajti fjalim me rastin e pesëvjetorit të anëtarësimit të Maqedonisë së Veriut në NATO. "Maqedonia e Veriut disa herë ka treguar se është aleat i fuqishëm dhe i aftë, kontribuues, jo vetëm marrës", tha admirali, duke shtuar se me dekada ushtarët tanë kanë qenë pjesë e operacioneve të NATO-s në Afganistan, Irak, Kosovë, BeH...

Shkup - Shefi i Shtatmadhorisë së Armatës, gjeneral-majori Sashko Llafçiski sot theksoi se pesëvjetori i inkuadrimit të vendit në NATO nuk e tregon vetëm përkushtimin tonë drejt sigurisë kolektive por është edhe reflektim i përkushtimit tonë të paluhatshëm ndaj vlerave demokratike, lirisë dhe stabilitetit. Para pesë viteve, tha Llafçiski, përmbushëm një nga qëllimet tona më të rëndësishme strategjike - anëtarësimin në NATO, ndërsa rruga nuk ishte fare e lehtë. Sot, shtoi shefi i SHM të Armatës, vendosmëria jonë, puna me përkushtim është lehtësisht e dallueshme. 

Ohër - Linja e re e drejtpërdrejtë ajrore nga Stambolli drejt Ohrit që do ta operojë komapnia ajrore "Turkish erllajn" do t'i përforcojë akoma më shumë lidhjet e mira tradicionale mes dy shteteve, dy popujve, të dy ekonomive... Kjo në përgjithësi është vlerësimi i përfaqësuesve turq të cilët dje morën pjesë në solemnitetin që u mbajt në aerportin e Ohrit me rastin e fluturimit inaugurues nga Stambolli. Ambasadori turk në vend, Fatih Ullusoj, në fjalimin para të pranishmëve, mes të cilëve edhe kryeministri Hristian Mickoski, ministra, kryetarë komunash, deputetë, theksoi se Turqia dhe Maqedonia e veriut janë dy vende të lidhura mes veti me lidhje të rrënjossura thellë hitorike dhe kulturore dhe të cilat kultivojnë raport të nivelit të lartë.

Beograd - Zëvendëssekretarja e përgjithshme e NATO-s, Radmilla Shekerinska, të hënën do të ketë takim me të dërguarin e posaçëm të BE-së për dialogun Prishtinë-Beograd, Peter Sorensen, njoftoi korrespondenti i MIA-s në Beograd. Në kumtesën e NATO-s nuk janë dhënë hollësira tjera rreth takimit të Shekerinskës me Sorensenin, i cili paradokohe ishte për vizitën e tij të parë në Prishtinë dhe Beograd pas marrjes së funksionit. Sorensen këtë javë në Beograd u takua me presidentin serb, Aleksandar Vuçiq, ministrin e Punëve të Jashtme Marko Gjuriq dhe drejtorin e Zyrës për Kosovë dhe Metohi, Petar Petkoviq.

Bruksel - Bashkimi Evropian nuk ka ndërmend t'i kushtojë vëmendje ose ta komentojë propagandën e presidentit rus, Vlladimir Putin, tha sot zëdhënësja e KE-së për Politikë të Jashtme dhe Siguri, Anita Hiper. E pyetur për koment të BE-së për propozimin e Putinit për vendosjen e Ukrainës nën administratë të përkohshme të KB-së, në mënyrë që të lejojë mbajtjen e zgjedhjeve të reja në vend, Hiper deklaroi se presidenti rus është kriminel me urdhër arrest ndërkombëtar dhe BE-ja nuk do t'i kushtojë vëmendje, e as nuk do të komentojë asnjë çështje që lidhet me propagandën e tij.

Bruksel - Komisioni Evropian sot miratoi Programin e Punës për Instrumentin "Evropa digjitale" për periudhën 2025-2027, me të cilin janë parashikuar 1,3 miliardë euro për mbështetjen e teknologjive kyçe që janë me rëndësi strategjike për të ardhmen e Evropës dhe sovranitetin teknologjik të kontinentit, njoftoi korrespondenti i MIA-s nga Brukseli. Siç njoftoi KE, Programi i Punës fokusohet në aplikimin e inteligjencës artificiale në sektorin e biznesit dhe administratën publike, në forcimin e sigurisë kibernetike dhe për rritjen e aftësive digjitale.

Bruksel - Kryetarja e Komisionit Evropian, Ursula fon der Lajen sot deklaroi se blloku prej 27 kombeve është i gatshëm të ndihmojë pas tërmetit të fuqishëm prej 7,7 ballë sipas Shkallës së Rihterit, që i ka goditur Mianmarin dhe Tajlandën. "Jemi të goditur nga skenat në Mianmar dhe Tajlandë pas tërmetit shkatërrues. Mendimet e mia janë me viktimat dhe familjet e tyre. Jemi të gatshëm të sigurojmë përkrahje të madhe", ka shkruar Fon der Lajen në rrjetin Iks.

Bangkok - Të paktën tre punëtorë e kanë humbur jetën, pasi një kullë 30-katëshe në ndërtim u shemb në Bangkok, pas tërmetit të sotëm të fuqishëm, tha zëvendëskryeministri tajlandez, Fumtam Vaçajaçai. Ai tha se 90 persona janë ngujur nën rrënoja. Shembja e kullës ndodhi pas tërmetit të fuqishëm me intensitet 7,7 ballë sipas shkallës së Rihterit. Shtatë persona janë nxjerrë jashtë, ndërsa kërkimet po pengohen nga rrënojat.

Nejpido - Të paktën 20 persona humbën jetën në Mianmar dhe tre në Tajlandë nga tërmeti me magnitudë 7.7 sipas shkallës Rihet që goditi sot Mianmarin qendror dhe u ndje në të gjithë Azinë Juglindore, shkruan "Njujork Tajms". Sipas Dr. Kjav Zin nga Spitali i Përgjithshëm Mandalej, në atë qytet kanë vdekur të paktën 20 persona, ndërsa 300 janë lënduar.  “Po vijnë gjithnjë e më shumë të lënduar, por nuk kemi mjaftueshëm mjekë dhe infermiers”, tha ai.