18:00 / 28 mars / 2025

Shkup - Këshilli Penal i Gjykatës së Apelit në Shtip, sot i hodhi poshtë si të papranueshme ankesat lidhur me masën e arrestit shtëpiak për dy ish kryetarët e Komunës së Koçanit, Ratko Dimitrovski dhe Nikolço Iliev, të cilët janë pjesë e të dyshuarve në hetimin për zjarrin në lokalin e natës "Puls", në të cilën humbën jetën 59 persona, ndërsa u lënduan gjithsej 200. Me këtë mbetet vendimi për përcaktimin e arrestit shtëpiak për Dimitrovskin dhe Ilievin, ndërsa Gjykata Themelore e Koçanit do të duhet të vendosë sërish vetëm për masën e parandalimit - sekuestrim të përkohshëm të udhëtimit apo dokumentit tjetër të Dimitrovskit për kalim të kufirit shtetëror.

Shkup - Fillimisht duhet të formohet një komision parlamentar me mbikëqyrje ndërkombëtare, e më pas të mendohet për hapa tjerë, thanë për MIA-n nga Bashkimi Demokratik për Integrim (BDI) në lidhje me paralajmërimin e liderit të LSDM-së, Venko Filipçe për takimin e liderëve. “Prandaj, ju bëjmë thirrje të gjithë deputetëve që nuk dëshirojnë që një nga  tragjeditë më të mëdha në vend të përfundojë me farsën më të madhe juridike të drejtësisë selektive dhe robërimit të shtetit, sot të nënshkruajnë nismën e “Frontit Evropian” për formimin e këtij komisioni”, theksojnë nga BDI-ja.

Shkup - Pas procedurës hetimore të zhvilluar plotësisht, Prokuroria Themelore Publike Shkup ka ngritur akuzë kundër një personi, i cili akuzohet për -  Vepër të rëndë penale kundër sigurisë së njerëzve dhe pronës në komunikacion nga neni 300 paragrafi 2 lidhur me nenin 297 paragrafi 1 të Kodit Penal. Në afat prej dy muajve nga ngjarja tragjike, prokurori kompetent publik ka mbledhur të gjitha provat dhe ekspertizat të cilat tregojnë se i akuzuari ka kryer këtë vepër më të rëndë kundër sigurisë në komunikacion, për cilën është parashikuar dënim maksimal deri 20 vjet burg.

Shkup - Në drejtim të integrimit të përshpejtuar rajonal të tregjeve energjetike të vendeve të Ballkanit Perëndimor në  tregjet tashmë të organizuara të Evropës Qendrore dhe Juglindore, ShA  MEPSO sot ishte nikoqire e  takimit në të cilin   morën pjesë përfaqësues të SELeNe CC nga Greqia dhe përfaqësues të operatorëve të sistemeve transmetuese nga Kosova dhe Shqipëria, KOSTT dhe OST-ja. Siç u theksua gjatë takimit, bashkëpunimi rajonal dhe zhvillimi i tregut të brendshëm të energjisë elektrike nuk mund të zhvillohen pa një Qendër koordinuese rajonale.

Shkup - Tetë pacientë të rinj të lënduar nga zjarri në Koçan nga klinikat e Shkupit lëshohen për mjekim shtëpiak, ndërsa nëntë po kthehen nga jashtë, njoftoi sot në konferencë për shtyp ministri i Shëndetësisë Arben Taravari. Sipas tij, në klinikat në Shkup do të mbesin vetëm 14 pacientë, ndërsa në mjekim jashtë vendit 91 pacientë. Tetë pacientët që duhet të mbërrijnë sot, tre nga Hungaria, dy nga Italia dhe nga një nga Athina, Beogradi dhe Suedia, sipas protokolleve të Shtabit të Krizave, do të qëndrojnë në klinikat e Shkupit për të paktën 24 orë për kontrolle shtesë. Një paciente nga Bullgaria, shpjegoi, tashmë ndodhet në një hotel dhe shkon vetëm për ekzaminime.

Shkup - Për shkak të mbajtjes së protestës para Kuvendit të RMV-së, Njësia për siguri në qarkullimin rrugor nesër me fillim në orën 11 do të ndërmarrë masa për regjim të veçantë të komunikacionit në zonën qendrore të qytetit të Shkupit, informojnë nga Ministria e Punëve të Brendshme. SPB Shkup u bën apel të gjithë qytetarëve pjesëmarrës në komunikacion që të respektojnë urdhërat e dhëna nga nëpunësit policorë.

Shkup - Koalicioni Vlen beson se kryetarit të LSDM-së, Venko Filipçe, i mungon kredibiliteti për të thirrur takimin e liderëve. Filipçe mbrëmë, në Mbrëmjen e donatorëve për të ndihmuar familjet e viktimave dhe të lënduarve në zjarrin në Koçan, paralajmëroi se javën e ardhshme në Kuvend do t'u bëjë thirrje liderëve të partive më të mëdha politike në takim për të prezantuar planin e tij - që e konsideron si obligim për ta bërë për shtetin, sepse, tha, "është e qartë se mënyrat konvencionale të udhëheqjes së politikës, të luftës politike, nuk japin rezultate mjaftë të shpejta".

Shkup - Kryetari i Lidhjes së Sindikatave të Maqedonisë (LSM), Sllobodan Trendafillov, sot në konferencë për media paralajmëroi se më 2 prill do të protestojnë nëpër rrugët e Shkupit. Kjo vjen pasi Qeveria të martën e miratoi informatën se paga minimale do të rritet për 1.800 denarë në neto,  ndërsa sipas LSM-së, vendimi është kundërligjor. "LSM del në rrugë më 2 prill, siç e kemi premtuar një muaj më parë. Ora kur do të fillojë seanca publike e organeve dhe trupave të LSM-së, duke përfshirë edhe sindikatat e bashkuara me LSM-në, është 12:05, duke marrë parasysh se 5 në 12 moti ka kaluar, ndërsa ora 12 kaloi atëherë, kur Qeveria vendosi të miratojë në mënyrë të njëanshme informacionin dhe me informacionin të përcaktojë masën e pagës minimale në dëm të afatit të punëtorëve, duke mos i pranuar propozimet e tyre për përcaktimin e vlerës së pagës minimale", tha Trendafillov.

Shkup - Ministri i Shëndetësisë, Arben Taravari sot u takua me sindikatat përfaqësuese të shëndetësisë. Në takimin është zgjidhur kërkesa shumëvjeçare e sindikatave për balancimin e koeficientit për pagesa të pagave, informojnë pasdite nga Ministria e Shëndetësisë. Sipas ministrit, rritja e vahzdueshme e pagave dhe përmirësimi i statusit të nëpunësve shëndetësorë, ka qenë shkak për takimin e sotëm me sindikatat, ku u afirmua bashkëpunimi i shkëlqyeshëm.

Shkup - Liderët e katër partive nga koalicioni VLEN sonte do të shkojnë për iftar tek kryeministri i Kosovës, Albin Kurti, njoftoi sot ministri i Shëndetësisë, Arben Taravari. Ai mes tjerash tha se pret të bisedojnë për tema aktuale politike në Kosovë, Maqedoni të Veriut dhe rajon, por edhe për zgjedhjet e ardhshme lokale. "Për zgjedhjet lokale jemi në një atmosferë të relaksuar dhe të mirë, shpresoj të gjejmë zgjidhjen më të mirë të mundshme, që të mos ketë të pakënaqur. Të gjitha partitë duhet të jenë të kënaqura në koalicionin", tha Taravari.

Shkup - Moti nesër do të jetë me vranësira të ndryshueshme dhe jostabil me të reshuratë përkohshme të shiut, posaçërisht pasdite. Lokalisht do të ketë kushte për paraqitje të të reshurave më të mëdha të shiut (për kohë të shkurtë mbi 15l/m2), paraqitje të bubullimave dhe erë të përforcuar. Temperatura minimale do të jetë në interval prej 3 deri 9, ndërsa ajo maksimale do të arrijë deri 18 gradë. Në Shkup, me vranësira të ndryshueshme dhe të reshura të kohëpaskohshme shiu. Pasdite në pjesë të luginës do të jetë me reshje të rrëmbyeshme dhe bubullima. Temperatura minimale do të ulet deri 8, ndërsa ajo maksimale do të arrijë deri 17 gradë.

Bangkok - Komunikacioni hekurudhor në tërë Tajlandën është ndërprerë pas tërmetit të fortë në Mianmarin fqinj, ndërsa në disa pjesë të vendit është ndërprerë dhe komunikacioni rrugor. "Të gjitha linjat hekurudhore (në Tajlandë) përkohësisht janë ndërprerë për të garantuar sigurinë e udhëtarëve pas tërmetit në Mianmar", theksohet në kumtesën e hekurudhës tajlandeze. Hekurudha kumtoi se operatorët për transport të shpejtë të Tajlandës janë urdhëruar të pezullojnë shërbimet, të evakuojnë udhëtarët dhe të garantojnë siguri, duke pastruar zonat nga rrënojat.

Nejpido - Mianmari sot shpalli gjendje të jashtëzakonshme në gjashtë rajone, përfshirë Sagaing dhe Nejpido, pas një tërmeti të fortë që goditi vendin. Autoritetet paralajmëruan se do të fillojnë operacionet e shpëtimit sa më shpejt të jetë e mundur, transmetuan mediat shtetërore. Sipas gazetës "Global Nju lajt", e cila kontrollohet nga junta ushtarake, qeveria tashmë po vlerëson dëmet dhe do të kërkojë qasje në ndihmë humanitare dhe ndihmë tjetër që ndahet në rast të fatkeqësive natyrore. Tërmeti shkaktoi dëme të konsiderueshme në ndërtesa dhe infrastrukturë, ndërsa ka shqetësime për gjendjen e pendave të mëdha", tha Kryqi i Kuq.

Nejpido - Të paktën 144 persona e kanë humbur jetën në tërmetin e fuqishëm me intensitet prej 7,7 ballë sipas Shkallës së Rihterit që sot e goditi Mianmarin, njoftoi televizioni shtetëror në Telegram. Po ashtu, thuhet se 732 persona janë lënduar në tërmetin, njofton Skaj Njuz. Tre persona e kanë humbur jetën në Tajlandë, ndërsa dy në provincën kineze Junan.