Moskë, 1 prill 2025 (MIA) - Kina dhe Rusia janë "miq përgjithmonë, armiq kurrë", deklaroi sot ministri kinez i Punëve të Jashtme Vang Ji gjatë vizitës së tij në Moskë, duke përshëndetur normalizimin e marrëdhënieve ndërmjet Rusisë dhe SHBA-së.

"Parimi "miq përgjithmonë, armiq kurrë" shërben si një bazë ligjore solide për zgjerimin e bashkëpunimit strategjik në një nivel më të lartë" tha Ji në një intervistë për mediat ruse. 

 Shefi i diplomacisë kineze është në një vizitë treditore në Moskë për të biseduar për bashkëpunimin strategjik, por udhëtimi po zhvillohet nën hijen e pasigurisë në negociatat e armëpushimit në Ukrainë dhe kritikave të drejtuara ndaj udhëheqjes ruse dhe ukrainase nga presidenti amerikan Donald Tramp.

Në Moskë, përveç homologut të tij Sergej Lavrovit, Vangu u takua edhe me presidentin Vladimir Putinin. 

Ministri kinez tha se rrethanat aktuale globale i detyrojnë fuqitë e mëdha të veprojnë si faktorë stabiliteti, ndaj është inkurajuese që Rusia dhe SHBA-ja po përpiqen t'i përmirësojnë marrëdhëniet e tyre.

"Është mirë për stabilizimin e marrëdhënieve të pushtetit midis fuqive të mëdha dhe nxit optimizmin në këtë situatë zhgënjyese ndërkombëtare", tha Vang Ji, cituar nga mediat ruse. 

Shefi i diplomacisë kineze ka hedhur poshtë pretendimet se Trampi po përpiqet të afrohet më shumë me Rusinë për ta larguar atë nga Kina, duke i quajtur ide të tilla "një përsëritje të të menduarit të vjetëruar konfrontues dhe të bazuar në bllok". 

Ji konsideron se bisedimet për armëpushimin në Ukrainë tashmë kanë çuar në rezultate të caktuara dhe se ato duhet të vazhdojnë pavarësisht pozicioneve të ndryshme dhe situatës së vështirë në fushën e betejës. 

 "Hapi drejt paqes, edhe pse jo shumë i madh, është konstruktiv - vlen të ndërtohet", tha ai, duke përfunduar se paqja është diçka që duhet "punuar shumë" për t'u arritur.