Shkup, 11 dhjetor 2025 (MIA) - Inspektorët në koordinim me Inspektoratin Shtetëror të Tregut (ISHT) dhe Ministrinë e Punëve të Brendshme (MPB) sot kryen aksione në "Rrugën e plastikave", si dhe në Zimzoland, ku u vërtetua se Qyteti i Shkupit nuk kishte lëshuar leje për të kryer aktivitete atje.

Kryetari i Qytetit të Shkupit, Orce Gjorgievski, informoi për këtë në Fejsbuk, duke theksuar se Qyteti i Shkupit, së bashku me Inspektoratin dhe në koordinim me ISHT-në dhe MPB-në, kryen një aksion të gjerë me qëllimin e vetëm për të rivendosur rendin dhe dinjitetin në hapësirën publike në të gjithë qytetin. Janë shqiptuar më shumë se 20 gjoba.

"Siç njoftova, ashtu po veprojmë. Nuk ka lëshime, nuk ka kompromise me kaosin. Po largojmë të gjitha fenomenet që e uzurpojnë hapësirën që u përket banorëve të Shkupit, pengojnë lëvizjen dhe prishin rendin publik. Shkupi duhet të jetë një qytet ku sundojnë rregullat, jo arbitrariteti. Punonjësit e Ndërmarrjes publike "Parkingu i Qytetit" po largonin automjetet e parkuara në mënyrë të paligjshme përgjatë "Rrugës së plastikave". Pas njoftimeve nga qytetarët, ne ndërmorëm veprime edhe në Zimzoland. Inspektorati ishte në vendngjarje dhe përcaktoi se Qyteti i Shkupit nuk kishte lëshuar leje për kryerjen e aktivitetit atje. U gjetën disa parregullsi, veçanërisht në lidhje me kryerjen e aktiviteteve jashtë objektit. Përveç kësaj, për rekuizitat dhe përmbajtjet argëtuese që nuk janë pjesë e programit të Komunës së Aerodromit, inspektori i ndërtimit nga komuna është udhëzuar të veprojë në përputhje me rregulloret ligjore", theksoi Gjorgjievski.

Theksoi se Qyteti i Shkupit dhe ai si kryetar do të vazhdojnë të luftojnë pa kompromis kundër çdo parregullsie, çdo përpjekje për uzurpim dhe çdo kaosi që e rrezikon hapësirën publike.

"Ky qytet meriton rend, ndërsa shkupjanët meritojnë dinjitet, vend të sigurt dhe të rregullt për të jetuar. Rendi është detyrim. Dhe ne e plotësojmë", shtoi Gjorgjievski. mb/