Токио, 10 мај 2023 (МИА) - Јапонија, Соединетите Американски Држави и Јужна Кореја преговараат за договор за споделување податоци во реално време за лансирање на севернокорејски проектили, бидејќи соработката меѓу трите земји станува сè поважна во услови на растечки нуклеарни и ракетни закани од Пјонгјанг, изјави портпаролот на јапонската Влада.

Главниот секретар на кабинетот Хироказу Мацуно рече дека сè уште не е постигнат договор, но „известен сум дека одбранбените власти енергично продолжуваат да работат на воспоставување таков аранжман“.

„Безбедносната средина околу Јапонија и Јужна Кореја станува сè потешка и сложена, а координацијата меѓу двете земји, како и трилатерално со САД, станува сè поважна“, рече Мацуно.

Јапонија и Јужна Кореја се поврзани одделно со податоците од американските радарски системи, но не директно една со друга поради затегнатите односи поради споровите од историјата, посебно поради пресудите на јужнокорејскиот суд во 2018 година, со кои се нареди јапонските компании да ги обесштетат корејските работници за време на војната поради злоупотреби, вклучително и принудна работа. Во ноември минатата година, лидерите на трите земји се договорија да ја забрзаат размената на информации за лансирање на севернокорејски балистички ракети. ссм/

фото: МИА архива