Собраниска делегација на 35. Годишна сесија на регионот Европа на ПС на франкофонијата во Атина
- Делегација на Собранието на Република Северна Македонија учествува на 35. Годишна сесија на регионот Европа на Парламентарното Собрание (ПС) на франкофонијата што се одржува во Атина, од 5 до 7 ноември.
Скопје, 7 ноември 2023 (МИА) - Делегација на Собранието на Република Северна Македонија учествува на 35. Годишна сесија на регионот Европа на Парламентарното Собрание (ПС) на франкофонијата што се одржува во Атина, од 5 до 7 ноември.
Како што информира собраниската прес-служба, во состав на делегацијата се Абдула Салиу, шеф на делегацијата, Бети Стаменкоска Трајкоска и Лидија Тасевска - членови и Лидија Каракамчева - секретар на делегацијата.
- Главна тема на дискусија на овој настан е војната во Украина, нејзините последици во Европа и геополитичките промени што таа ги носи во светот. Повеќедимензионалната криза што ја погодува Европа денес – безбедносна, системска, имиграциска, енергетска и економска криза – како последица на војната во Украина, е истовремено и криза на демократијата, се вели во соопштението.
Делегацијата на Собранието, како што се наведува, застана целосно во поддршката на суверенитетот и територијалниот интегритет на Украина, за воспоставување на мирот и просперитетот во регионот и одбрана на човековите права и слободи. На тој начин се брани Европа и целиот слободољубив свет, затоа што тоа се вредности кои ги почитува и вреднува сиот демократски свет.
Во рамки на панел дискусиите се опфати темата за интегрирањето на земјите од Југоисточна Европа во евроатланските и европските институции. На оваа тема своја дискусија имаше пратеничката Лидија Тасевска, која потенцираше дека Северна Македонија како земја-кандидат за членство во ЕУ верува дека институциите на Европската унија ќе ја одржат перспективата на проширувањето на Унијата со сите останати земји-кандидати како кредибилен и визибилен процес базиран на заслуги, имајќи ги предвид и актуелните геополитички безбедносни предизвици. Според неа, важно е ЕУ да не го изгуби фокусот на Западен Балкан и да дејствува како кохезивна регионална сила и да не ја одлага интеграцијата на делови од сопствениот географски регион.
Тасевска укажа дека Северна Македонија се залага за зачувување на мирот и стабилноста во Западен Блакан, преку забрзувањето на евроатлантските и евроинтегративните процеси на земјите од Западен Балкан, кои се наши приоритети во надворешната и безбедносната политика. Истакна дека Северна Македонија гледа на европската политичка заедница како на нов форум за дијалог на високо ниво за европските геостратешки прашања, но и како на платформа која им дава можност на земјите од Западен Балкан да ја подобрат регионалната соработка и да ги споделат најдобрите практики. Но за земјата прв и најважен надворешнополитички приоритет останува - полноправното членство во ЕУ.
- Се очекува на крајот на овој настан, пратениците да усвојат Декларација со која Регионално собрание на Европа, обединето со визија за праведен и мирен меѓународен поредок заснован на правила, да повика на итен прекин на сите непријателства и враќање на мирот на европскиот континент и на Блискиот Исток, се наведува во соопштението. мд/са/
Фото: Собрание на Северна Македонија