Скопје, 30 ноември 2-23 (МИА) - Подготовките за избори почнуваат, обично така е пет - шест месеци пред избори. Добра страна е што имавме и се уште имаме интензивна теренска активност која што започна летото, трае цела есен, еве и зимава, неколку дена во недела сме со граѓаните. Добиваме информации од граѓаните како ги гледаат работите, истакна потпретседателот на ВМРО-ДПМНЕ, Александар Николоски.

Во утринската емисија на „Слободен печат“ Николоски вели дека при теренската активност на ВМРО-ДПМНЕ направено се добри контакти, а по празниците веројатно ќе влезат во онаа класична изборна кампања која што ја знаат граѓаните.

-Ситуацијата непотребно се искомплицира имајќи в предвид дека позициите на дел политички партии вклучувајќи ги и владејачките беа дека треба да се случат раздвоени избори. А, тоа немаше никаква логика. Имајќи в предвид дека временската разлика помеѓу претседателските и парламентарните избори не може да е повеќе од месец и половина до два. Да биле шест – седум месеци веќе е некоја друга ситуација. Мислам дека на страна на владејачката СДСМ имаше погрешно правно мислење дека изборите можат да се случат нанапред, а не наназад од датумот на избори на последниот циклус. Што е погрешно толкување на Уставот. После тоа тие сфатија дека тоа е грешка и веќе се дојде до разумен заклучок дека неодржливо е за државата и финансиски и логички ако сакате и политички на пример во април  да има претседателски избори два круга, а на крај на мај да има парламентарни избори, појасни Николоски.

Тој посочи дека сега има две опции во однос на датум за избори. Едната опција е првиот круг на претседателски избори да биде на 31 март, а вториот круг на претседателски избори заедно со парламентарните избори да бидат на 14-ти април. И втората опција е она што и ВМРО-ДПМНЕ го предложи, а тоа е на 24-ти април да биде првиот круг на претседателски избори,  а на 8-ми мај да биде вториот круг на претседателски избори заедно со парламентарните.

-Во овој наш предлог има две карактеристики, прво Парламентот оди на редовни избори што значи дека е во функција и по одржувањето на изборите до конструирање на новиот Парламент. И може да се направи и инаугурација на новоизбраниот претседател на државата на 12-ти мај кога на Стево Пендаровски му завршува мандатот. Втората карактеристика е што изборите би биле во среда како што беше во 2020-тата па и во 2006-та всушност.  Од причина што петти мај, недела е Велигден и имајќи в предвид дека е голем верски празник не би било логично да има избори, рече тој.

Николоски додаде дека засега нема официјални разговори за изборите. Власта засега реши дискусијата околу избори да ја води преку медиуми.

-Треба неколку прашања да се затворат, прво мислам дека треба да се случат измени на Изборниот законик барем во препораките на набљудувачките мисии на ОБСЕ/ОДИХР, оценската мисија. Тука има препораки кои што ние ги нарекуваме технички имајќи в предвид дека не задираат во политичкиот дел, но се многу суштински за начинот на гласање. Има неколку сектори кои што можам да ги споменам, прво е правото на гласање на лицата со навршување на 18 години, а што се случува со оние кои што навршуваат 18 години помеѓу двата изборни круга. А, Уставот вели дека е гарантирано избирачкото право. Понатака, што се случува со гласањето, но не само гласањето туку и начинот за следење на кампањата на лицата со попреченост. Има бројни препораки кои што мислам дека е добро да се преточат. Понатака што се случува со лицата кои што имаат истечени лични документи не по своја вина туку гледате што се случува со системот. И тоа е прашање кое што треба да се реши. Понатака имавме една ситуација на локалните избори пред се во општините Центар Жупа и Маврово  Ростуше, но може да се рашири  и во други општини каде што не можеа да се завршат изборните циклуси затоа што не можеше да се постигне цензус, а има препорака од ОДИХР доколку еднаш не успеат избори тогаш вториот пат да нема таков цензус односно тие што ќе излезат мнозинство да си изберат градоначалник, што е логично решение, рече Николоски.

Тој посочува дека очекуваат убедлива победа затоа што, како што вели, јасно е од сето она што го гледаме помеѓу граѓаните е дека две константи стојат, прво е дека економијата тоне, а второ дека корупцијата цвета. 

-Особено во делот на корупција, таа е спуштена толку ниско што веќе не зборуваме за високопрофилирана корупција кај највисоките носители на државната власт туку зборуваме за корупција која што е спуштена на најниско можно ниво. Затоа што нема ред, и нема контрола и тоа е нешто што граѓаните го чувствуваат во секојдневниот свој живот и начин на живеење, истакна потпретседателот на ВМРО-ДПМНЕ.

Според него, веќе се случува еден вид олигархија во Судскиот совет и Советот на јавни обвинители. - Тоа е магичен круг каде што никој не одговара и скоро да нема судија, обвинител кој што одговарал овие години. Академијата за судии и обвинители наместо да е еден вид на факултет за судии и обвинители стана место на деца на судии и обвинители, па и на политичари да стануваат судии и обвинители. И тоа треба да се истражи, псоочува Николовски. дма/лв/

Фото:ВМРО-ДПМНЕ