МИА Општински пул

Скопје, 27 март 2023

Делчево - Министерството за земјоделство, шумарство и водостопанство во соработка со ЈП Национални Шуми денес организираше акција за пошумување и обнова на опожарена површина со пожарите од 2021 година на територија од општина Делчево.

Како што истакна Саша Јовановиќ, раководител на Сектор за шумарство во МЗШВ, согласно програмата за проширена репродукција на министерството за оваа 2023 година предвиденое пошумување на површина од 51 ха, каде ќе се засадат околу 102.000 садници.

-Денес присуствуваме на акција за санација на пожарите од катастрофалните пожари кои го зафатија овој терен пред 2 години. Во Програмата за оваа година е предвидено да се санира површина од 51 хектар. По исчистувањето на теренот, се пошумува со црн бор и багрем, така што ќе создадеме мешана шума и во иднина, како таква, ќе биде помалку подложна на шумски пожари. Државата за оваа намена инвестира за санација на опожарените површини на 153 хектари за санација од пожарите од 2021 година, истакна Јовановиќ.

Маре Басова, помошник директор во ЈП Национални шуми од секторот за одгледување, подигање, екологија и лов додаде дека во рамки на денешната акција се засадени околу 3000 садници, а главна цел е создавање мешовити насади со цел намалување на катастрофалните последици при идна појава пожари.

Кавадарци - Осветлен е патот од излезот на кавадаречкото село Ваташа до велосипедско - пешачката патека, информираа денеска од кавадаречката локална самоуправа.

- Континуирано се врши поставување на нова ниско напонска инсталација за улично осветлување на потегот на излезот од село Ваташа и почетокот на велосипедско - пешачката патека.

Градежните работи како и вкупно 30 канделабри, се донација од компанијата ,,Кожувчанка", од кои 15 се поставени на овој потег, соопштија од Општината.

Оттаму додадоа дека со ова, е извршено целосно осветлување на овој дел од патеката.

Од Локална самоуправа Кавадарци информираа дека во завршна фаза е поплочувањето на тротоарот пред ООУ „Гоце Делчев". Овој проект е дел од програмата за комунална изградба за 2022 година. Изведувач на работите е фирмата ,,Павер трејд".

Тетово - Тетовската полиција информира дека 21-годишен возач со својот автомобил удрил и усмртил мечка и притоа е повреден.

Во СВР Тетово настанот е пријавен 40-тина минути по полноќ, а се случил на автопатот Тетово - Скопје.

-Пријавено е дека на автопатот Тетово-Скопје, во близина на Карпалак, патничко возило „фолксфаген поло“ со скопски регистарски ознаки, управувано од 21-годишниот В.И. од Седларци, општина Василево, удрило и усмртило мечка. Во несреќата возачот се здобил повреди и бил пренесен во тетовската Клиничка болница за укажување на лекарска помош, информира портпаролот на СВР Тетово, Марјан Јосифоски. На местото увид извршила екипа од Секторот за внатрешни работи Тетово.

Штип- Универзитетот „Гоце Делчев“ (УГД)-Штип денеска одбележа 16 години од своето постоење. Пофалници и ваучери од 10.000 денари беа доделени на најдобрите дипломирани студенти во изминатава година. Ректорот на УГД-Штип, Дејан Мираковски истакна дека ова е мотивација за студентите, а доделувањето беше дел од Свечената академија по повод патрониот празник на Универзитетот, која се одржа во Мултимедијалниот центар на Економскиот факултет. Памела Реџеповска дипломирана студентка – инженер по компјутерски науки вели за наградените студенти ова значи дополнителна мотивација уште понапорно да учат и работат.

-Сметам дека наградите се одличен пристап за славење на напорниот труд и работа за време на академските студии на студентите. И самото најмало признание може да биде огромна мотивација за студентот, а исто така и да ги поттикне останатите студенти да работат уште понапорно, вели Реџеповска.

Охрид – Изминатиот викенд во Париз беа одржани неколку манифестации посветени на ликот и делото на големиот македонски онколог и научник д-р. Анастас Коцарев, по повод 113-годишнината од неговото раѓање и 92-годишнината од упокојувањето.

Чествувањата на Коцарев беа заокружени вчера со комеморативна церемонија одржана на неговиот гроб во париската општина Бонди, на која меѓу другите присуствуваа градоначалниците на Охрид, Кирил Пецаков и на париската општина Бонди, Стефен Ерве, како и претседателот на Македонската академија на науките и уметностите, академик Љупчо Коцарев и членови на семејството Коцареви од Охрид.

Градоначалникот на Охрид, Пецаков, го потенцираше значењето на делото на д-р Анастас Коцарев како една ретка и уникатна приказна на човек кој му подарил „големо нематеријално наследство“ на светот и најави низа иницијативи кои во координација со општина Бонди ќе се реализираат етапно, од именување улици и објекти во двете општини со неговото име, обележување на местата каде живеел и творел, до подготовки за пренесување на гробот на научникот во Охрид и отворање на музеј во неговиот роден град.

„Македонија и Франција имаат вистинска причина за уште едно поврзување и одговорност да работат на популаризација на научната оставнина на научникот“, рече Пецаков додавајќи дека д-р Анастас Коцарев припаѓа на ретките граѓани на светот кои планетарно дале придонес за општото добро на сите преку нивната научна и пожртвувана работа во медицината.