Техеран, 2 јули 2024 (МИА) - Двајцата преостанати кандидати во трката за претседател на Иран вчера се обвинија меѓусебно дека немаат решение за проблемите на Исламската Република.

Меѓусебните обвинувања беа упатени за време на телевизиската дебата што траеше повеќе од два часа и се одржа пред вториот круг од претседателските избори во Иран во петок. Изборите се закажаа откако претседателот Ебрахим Раиси загина минатиот месец во хеликоптерска несреќа.

Реформистичкиот кандидат Масуд Пезешкијан и тврдокорниот Саид Џалили се впуштија во остра вербална пресметка.

Џалили го обвини Пезешкијан дека нема план за управување со земјата и рече дека евентуалното владеење на Пезешкијан ќе го стави Иран во неповолна положба.

Џалили рече дека „со помош на народот“ ќе постигне годишен економски раст од 8 проценти за Иран, ветување што наиде на потсмев кај неговиот противник.

Пезешкијан, пак, додаде дека Џалили доколку не го исполни ветувањето, треба да биде погубен.

„Иран треба да води динамична надворешна политика ако сака да има успешна економија“, рече Џалили.

Пезешкијан најави дека неговата надворешна политика ќе се заснова на „ангажираност со светот“ и ќе вклучи „преговори за укинување на санкциите“ против Техеран.

И двајцата кандидати ветија дека ќе се борат против сиромаштијата, проблемите на работниците, на жените, на етничките и верските малцинства. Ветија и подобар и побрз интернет. паг/

Фото: ЕПА