Хелсинки, 11 февруари 2024 (МИА) - Поранешниот премиер Александар Стуб и поранешниот министер за надворешни работи Пека Хаависто денеска се натпреваруваат во вториот круг од претседателските избори во Финска, откако ниту еден од кандидатите не обезбеди доволно гласови во првиот круг пред две недели.

Гласачките места се отворени од 9 до 20 часот по локално време, а излезните анкети се очекуваат веднаш по затворањето. Прелиминарните резултати се очекуваат вечерва. Стуб, конзервативец и Хаависто од Зелените освоија најмногу гласови од деветте кандидати во првиот круг. Стуб доби 27,2 отсто од гласовите, а Хаависто 25,8 отсто.

Тие ги победија другите кандидати, влијателни лица во финската политика, како што се десничарскиот популистички претседател на парламентот Јуси Хала-ахо и поранешниот еврокомесар Оли Рен.

По изборната кампања обележана со меѓусебно почитување и дискусии за политиката, наместо со лични напади, Стуб влегува во одлучувачкиот круг на гласање со малку поголеми шанси за победа. Во последното истражување на јавното мислење спроведено од телевизијата Yle пред денот на изборите, тој беше со 54 отсто, додека Хаависто имаше 46 отсто. Други анкети во последните денови дадоа слични резултати. Сепак, Yle предупредува дека во нивната анкета толку многу гласачи сè уште биле неопределени, што исходот сепак може да се сврти во корист на Хаависта.

Првите проекции веднаш по затворањето на гласачките места ќе се базираат на предвремени гласања. Тие треба да дадат добра слика за конечните резултати, бидејќи 46 отсто од гласачите со право на глас кои живеат во Финска го дадоа својот глас пред самиот ден на изборите.

Победникот ќе ја преземе функцијата на почетокот на март, наследувајќи го претседателот Саули Ниинисто, кој заврши два шестгодишни мандати и повеќе не му е дозволено да се кандидира. Претседателот на Финска се избира директно и има значителни овластувања во надворешната и безбедносната политика.

Финска споделува 1.340 километри долга граница со Русија. Под раководство на Нинисто и по руската инвазија на Украина, нордиската земја одлучи да аплицира за членство во НАТО во 2022 година. По една деценија воена неврзаност, таа стана 31-ва членка на одбранбената алијанса во април 2023 година. ссм/

фото: ДПА