Штип, 24 јули 2022 (МИА) - Општина Штип има регистрирано десеттина нелегално изградени објекти, за коишто градежниот инспектор донел решение за нивно уривање, но државната второстепена Комисија ги поништува, информира градоначалникот на Општина Штип, Иван Јорданов. Тој, како што вели, е револтиран на ваквиот однос со справувањето на нелегалните објекти, кои се градат на државно земјиште, а нивната квадратура достигнуваат и до 500 квадратни метри. -Не станува збор за бесправно изградена соба или некоја надградба на куќа, туку изградба на објекти над 100-тина квадрати коишто се на државно земјиште и кои по сите Закони и според записниците на градежните инспектори треба да бидат отстранети затоа што немаат дозвола за градба, ниту пак имаат сопственост на земјиштето. Но, второстепена комисија веќе неколку пати го поништува решението на градежниот инспектор, со одредени забелешки кои не се според Закон, изјави Јорданов. Тој најави дека документите ќе ги достави до медиумите, но и до институциите, бидејќи се сомнева оти во овие случаи има корупција. Посочи дека помалите, особено руралните општини немаат градежни инспекциски служби, но благодарение на меѓусебната општинска соработка, инспектори се позајмуваат за работа од една во друга општина. Општина Штип има доволен број на инспектори, кои според потребите ќе бидат ангажирани во општините Карбинци, Радовиш и Бутел. вдј/вј/