Shkup, 28 dhjetor 2024 (MIA) - Pjesa më e madhe e tregtarëve po i kthejnë çmimet në nivelin para rritjes, por vendimi për ngrirjen e çmimeve është përgatitur, thonë nga Qeveria, duke treguar se vazhdojnë ta monitorojnë situatën. Nëse të gjitha marketet që janë regjistruar për shportën e Vitit të Ri nuk i shtojnë asaj produkte bazë ushqimore, atëherë Qeveria, siç tregohet, do të detyrohet të marrë një vendim dhe masë jo të popullarizuar në treg.

Sipas informacioneve nga Inspektorati Shtetëror i Tregut, i cili ishte në terren, çmimet e disa produkteve ushqimore bazë tashmë janë ulur në disa tregje, madje në disa tregje çmimet janë ulur për 20 deri në 25 për qind.

"Shporta konsumatore e Vitit të Ri", e cila filloi më 15 dhjetor dhe do të zgjasë deri më 15 janar, përfshin gati 1.180 produkte që mund të shihen në ueb faqen "mojakosnica.mk".

Pas ankesave të qytetarëve për rritje të çmimeve të produkteve ushqimore bazë që nuk janë përfshirë në shportën e Vitit të Ri, kryeministri Hristijan Mickoski dje tha se shumica e shitësve me pakicë po respektojnë udhëzimet që u janë dhënë për t'i kthyer çmimet e produkteve në nivelin para rritjes që kanë bërë. Pas hyrjes në fuqi të fushatës "Shporta e Vitit të Ri", për të cilën qytetarët ngritën alarmin.

Situata do të monitorohet dhe nëse ka sjellje devijante nga tregtarët, Mickoski tha se do të ndërmerren masa dhe përkujtoi se gjithmonë ekziston mundësia që çmimet të kufizohen sërish me vendim të Qeverisë.

"Marr informacion nga ISHT se shumica e tregtarëve po i kthejnë çmimet në nivelin që kishin para se të kishin rritje. Ata respektojnë indikacionet që ne iu drejtuam publikisht atyre. Pres që kjo të vazhdojë edhe në periudhën në vijim, ndonëse situata do të monitorohet rregullisht me kontroll intensiv nga ISHT-ja dhe nëse do të kemi sjellje devijuese nga ana e tregtarëve, do të merren masa. Ndryshe, masa e fundit që ka në dispozicion qeveria është që sërish të vendosë kufizim apo limitim të çmimit, por në këtë moment shohim se shumica e tregtarëve e respektojnë atë indikacion dhe kërkesë”, tha Mickoski, pas prezantimit të rezultateve të punës së Ministrisë së Punëve të Brendshme. 

Masa "Shporta konsumatore e Vitit të Ri" zgjat edhe 20 ditë dhe tregtarët aktualisht nuk mund të marrin gjoba, pasi siç thekson ministri i Ekonomisë dhe Punës, Besar Durmishi, kjo masë buron prej tyre, por thotë se pret që të kenë përgjegjesi shoqërore, siç është premtuar gjatë bisedimeve.

Qeveria tani për tani nuk do të marrë vendim për ngrirjen e çmimeve, sepse, siç mund të shihet nga dje në raftet e marketeve, ka pasur rënie të çmimeve të produkteve, të cilat janë rritur në muajin e kaluar, informoi dje ministri i Ekonomisë dhe Punës Besar Durmishi në konferencën për media.

Ai i porositi tregtarët se nëse vazhdojnë të rrisin çmimet, vendimi për ngrirjen e çmimeve është gati dhe do të thirret menjëherë seancë të Qeverisë.

“Sot kemi një vendim përgatitur tashmë për ngrirjen e çmimeve, por tani për tani nuk do t'ia propozojmë Qeverisë, do të monitorojmë situatën e çmimeve. Nëse ndodh një rritje e përnjëhershme e çmimeve, unë menjëherë do të kërkoj që të thirret seancë e jashtëzakonshme e Qeverisë dhe të propozoj vendim për ngrirjen e çmimeve. Pas paralajmërimit tonë, tregtarët erdhën në vete dhe ulën çmimet, sepse siç thashë dhe do ta përsëris tani, nuk do të lejojmë rritje lakmitare të çmimeve të produkteve ushqimore bazë gjatë festave", tha Durmishi.

Zëvendësministri i Ekonomisë dhe Punës, Marjan Risteski, dje nga Prilepi paralajmëroi se nëse të gjitha marketet që janë regjistruar për Shportën e Vitit të Ri nuk i shtojnë produktet bazë ushqimore dhe në zinxhir janë 700, atëherë Qeveria do të jetë të detyruar të marrë një vendim dhe masë, që nuk është njohur në treg.

"Inspektimi i tregut do të jetë non-stop në terren. Dhe nëse deri në fund të ditës kjo nuk ndodh në të gjitha marketet që janë regjistruar për shportën e Vitit të Ri, ndërsa në zinxhir janë 700, atëherë qeveria do të detyrohet të shkojë me një vendim dhe një masë që nuk është popullore në treg, por do të duhet të mbrojmë standardin e qytetarëve në këtë periudhë rreth Vitit të Ri dhe festave", tha Risteski.

Sipas zëvendesministrit të Ekonomisë dhe Punës, në ditët e para me aplikimin e masës për shportën e Vitit të Ri, ka pasur ulje të çmimeve të më shumë se 1100 produkteve, të mbuluara me aksionin, me të paktën 10 për qind.

"Por, ndryshe nga ata kemi pasur rritje të produkteve të tjera bazë që nuk janë përfshirë në shportën e Vitit të Ri. Tani janë shtuar edhe ato produkte dhe prandaj analiza në fund të ditës do të tregojë nëse Qeveria do të vazhdojë apo jo me masa", tha Marjan Risteski, zëvendësministër i Ekonomisë dhe Punës.

Ai shpreson se pas shportës së Vitit të Ri, rezultati sipas statistikave do të jetë në favor të kursimeve në buxhetin e familjes mesatare të Maqedonisë. mb/

Foto: MIA