Shkup, 30 mars 2025 (MIA) - Nevojitet përparim i mëtutjeshëm i arsimimit financiar tek të rinjtë përmes aktiviteteve mësimore dhe jashtëshkollore, me qëllim që ata të kenë jetë cilësore, të planifikojnë buxhetin dhe financat e tyre dhe  me mençuri t'i përdorin mjetet të cilat i kanë në dispozicion, konsiderojnë pjesëmarrëset e Forumit të tretë Ekonomik të Grave që sot mbahet në Shkup.

"Sot në këtë ngjarje diskutojmë për arsimimin financiar të të rinjve, i cili praqet kusht për cilësinë e tyre të ardhshme të jetës, gjegjësisht për planifikimin e buxhetit dhe financave të tyre, për përdorimin e mjeteve që kanë në dispozicion dhe për marrjen e disa njohurive paraprake për punën ekonomike. Arsimi i Maqedonisë në programet e tij përmban elemente të arsimimit financiar si në arsimin fillor ashtu edhe në atë të mesëm, përmes lëndëve të detyrueshme dhe zgjedhore në arsimin fillor dhe të mesëm, ku fëmijët fitojnë njohuritë që u nevojiten në nivel të përshtatshëm për moshën e tyre për punë të mëtutjeshme apo menaxhimin e financave të tyre", tha ministrja e Arsimit dhe Shkencës Vesna Janevska.

 Çdo sistem, shtoi ajo, mund të përmirësohet dhe prandaj Ministria së bashku me Byronë për Arsim, Bankën Popullore, Asociacionin e Bankave të Maqedonisë dhe institucionet e tjera vazhdimisht shkëmben informacione dhe përvoja për përmirësimin e këtij segmenti të procesit arsimor.

 Ana Dokoska, kryetare e shoqatës "Unë jam grua", thotë se këto lloj ngjarjesh janë një mundësi për të parë gjendjen e arsimimit financiar tek fëmijët dhe të rinjtë, sfidat me të cilat përballemi dhe cilat janë zgjidhjet e mundshme për tejkalimin apo përmirësimin e tij. Krahas aktiviteteve jashtëshkollore, konsideron ajo, do të ishte mirë që në të gjitha shkollat ​​të futet edhe një lëndë e arsimimit financiar.

 Forumi mbahet në organizim "Unë jam grua",  "Global Shapers Skopje Hub", Fakulteti për Turizëm dhe Logjistikë të Biznesit në Universitetin e Shtipit dhe autorja e lëndës dhe planifikuesja personale e buxhetimit "Buxheti im" - Jasmina Hristovska, nën patronatin e Komunës së Kisella Vodës.

 Siç njoftojnë nga Shoqata për rrjetëzimin e grave të suksesshme, arsim dhe hulumtim "Unë jam grua", ndër panelistët kryesorë në forum janë ministrja e Arsimit dhe Shkencës, Vesna Janevska dhe Ministrja e Financave, Gordana Koçoska Dimitrieska.

 Foto: MIA