Вашингтон, 12 декември 2024 (МИА) - Новоизбраниот американски претседател Доналд Трамп изјави дека ја избрал Кари Лејк, поранешна водителка на вести и републиканка која не успеа да освои место во Сенатот минатиот месец, за директор на медиумот Глас на Америка финансиран од американската влада.

Во објавата на неговата страница „Truth Social“, Трамп објави дека Лејк „ќе обезбеди фер и прецизно емитување на американските слободарски вредности низ светот, наспроти лагите што ги шират медиумите за лажни вести“.

Лејк, верен поддржувач на Трамп која ги повтори неговите лажни тврдења за измама на изборите во 2020 година, ја загуби трката за гувернер во 2022 година во државата Аризона, а претходно беше водителка на Фокс 10 со седиште во Феникс.

Гласот на Америка (VOA) е меѓународна медиумска компанија што работи на повеќе од 40 јазици онлајн и вклучува радио и телевизија.

За време на неговиот прв мандат, Трамп се судри со Гласот на Америка и ги обвини за засилување на кинеската пропаганда. зш/