Скопје, 28 март 2025 (МИА) - Претседателот на Сојузот за синдикатите на Македонија (ССМ), Слободан Трендафилов денеска на прес-конференција најави дека на 2 април ќе одржат протест на улиците во Скопје. Ова доаѓа откако во вторникот Владата ја усвои информацијата дека минималната плата ќе се зголеми за 1.800 денари во нето износ, а според ССМ, одлуката е незаконска.

-ССМ излегува на улица на 2-ри април, онака како што ветивме пред еден месец. Часот кога ќе почне јавната седница на органите и телата на ССМ, вклучително и синдикатите здружени во ССМ, е 12:05, имајќи во предвид дека 5 до 12 одамна помина, а 12 часот помина тогаш, кога Владата одлучи еднострано да усвојува информација, и со информација да утврдува износ на минимална плата на штета на работниците во Македонија, не прифаќајќи ги нивните предлози за утврдување на висината на износот на минималната плата, рече Трендафилов.

Тој напомена дека до сега, ниту со поголемиот дел од гранските синдикати здружени во ССМ не се преговара, не се разговара за висините на платите на вработените во јавниот сектор, онака како што е предвидено во општиот колективен договор.

-Не се преговара и не се разговара за висините на платите на вработените во јавниот сектор, онака како што е предвидено во општиот колективен договор, а тоа е да добиеме функционерски плати, просечна плата по коефициент на сложеност или зголемување на платите на вработените во јавниот сектор за 12,6 проценти во нето, или 12, 9 проценти во бруто, додаде Трендафилов.

Тој обвини дека од последната прес-конференција се засилиле нападите кон синдикатите здружени во ССМ и кон Сојузот на синдикатите на Македонија од политичка партија.

-Се засилија нападите како од политичка партија така и од политички поставени директори кои примаат плата од нашите плати, кои ги плаќаме како даноци во државата, не ги плаќаме за да ги минираат процесите за да ги намалуваат платите и за да не ги остваруваат барањата и заложбите на работниците, не ги плаќаме за жестоко да се борат со закани, со уцени за отказ од работни места, за намалување на плата, за суспендирање на наши синдикални активисти, со една цел да направат друг Синдикат репрезентативен на штета на работниците, додаде Трендафилов.

Како што информираше, денеска почнала со работа Комисијата за утврдување на репрезентативност, и посочи дека само Сојузот на синдикатите на Македонија бара утврдување на репрезентативност на ниво на територија, ниту еден друг синдикат нема поднесено барање.

-Само Сојузот на синдикатите на Македонија бара утврдување на репрезентативност на ниво на територија, со што ќе се овозможи негово учество во економско социјалниот совет, во Комисијата за утврдување за репрезентативност како и во други трипартитни социјални партнерства, органи и тела на државата, вклучително и барање за утврдување на репрезентативност во јавниот и приватниот сектор и ниту еден друг синдикат ја нема ниту бројката, ниту има поднесено барање, а жестоко се борат против ССМ за да не ја добие репрезентативноста, со која уште погласно ќе ги кажува барањата на работниците, посочи Трендафилов.

Тој потсети дека на последната прес-конференција го кажале своето барање до последниот работен ден во месец март да седнат и да разговараат на заедничка маса за одредување на висината на минималната плата, онака како што е предвидено во законот.

-Ние како Сојуз на синдикати на Македонија пред еден месец на прес-конференција најавивме до последниот работен ден во месец март да бидеме испочитувани на начин како што доликува во демократско општество и во демократските земји, да седнеме на заедничка маса, да разговараме за висината на минималната плата онака како што е предвидено во законот, а предупредувавме на можностите, како и на опасностите за објавувањето и на минималната плата која сака да ја објави Владата, и покрај тоа што не бевме слушнати. Слушнавме дека Владата усвоила информации и за првпат од донесувањето на Законот за минимална плата во 2012 година, еднострано одлучува за судбината на работниците, без во тоа да бидат вклучени ниту синдикатите, односно, ниту работниците, ниту работодавачите кои можеби имале друго мислење, рече Трендафилов.

Тој додаде дека ставот 5 од Законот од член 4 на Законот за минимална плата вели „Министерот за труд и социјална политика, по претходно мислење на Економско социјалниот совет ќе ја објавува висина на минималната бруто плата, усогласена согласно ставот 1“.

-Бидејќи пратениците си земаа две недели годишен одмор, не се одважија да го сменат Законот и да утврдат износ на минимална плата која ќе биде 30 илјади денари и потоа ќе се зголемат сите останати плати со она што ние го предлагавме во трите чекори, утре можеме да се доведеме во ситуација работници да бидат принудени од газдите во приватниот сектор да враќаат паричен износ колку што ќе изнесува минималната плата, а би била незаконски објавена во Службен весник, рече Трендафилов. бт/нд/

Фото: Принтскрин