Скопје, 9 октомври 2024 (МИА) - Со премиерната проекција на црногорскиот игран филм „Планета 7693“ во режија на Гојко Беркуљан, копродукција со Северна Македонија и Србија, ќе се отвори јубилејното 20-то издание на „Кидс фест“ во Белград. Фестивалот ќе се одржува од 12-ти до 20-ти октомври во Белград, Нови Сад, Крагуевац и Ниш.

Како што информира „Скопје филм студио“, „Планета 7693“ е семејна авантура со sci-fi елементи, која го следи деветгодишниот Лука кој живее со родителите и поголемата сестра во живописно соседство во предградието. По еден настан во неговото навидум хармонично семејство, недоразбирањата насобрани низ годините излегуваат на површина и предизвикуваат низа конфликти. Ткивото на семејството се кине. Лука бара начин како да ги поправи нарушените односи, повлекувајќи се во светот на „супер моќите“ и фантазијата каде го запознава мистериозното девојче по име „7693“.

Главните улоги ги толкуваат Илија Пејаковиќ, Андрија Кузмановиќ, Кристина Обрадовиќ, Хана Иванишевиќ и Мара Ракчевиќ. Оригиналното сценарио е на Ана Вујадиновиќ Томиќ, како кинематографер се потпишува Александар Јакониќ, а композитори се Петар Вагнер и Лука Јовановиќ. Дизајнер на звук е Милош Дрндаревиќ, сценограф  е Тамара Тричковиќ, костимограф – Лина Лековиќ, а монтажата е на Владимир Павловски. Продуцент на филмот е Марко Јаќимовиќ, а копродуценти се Томи Салковски и Ивица Видановиќ.

 „Планета 7693“ е копродукција меѓу Гигглинг Гоат Продукција од Црна Гора, СиннеРент Продукција од Србија и „Скопје филм студио“. Филмот е поддржан од страна на: Агенцијата за филм на Северна Македонија , Филмскиот центар на Црна Гора, Министерството за култура и медиуми на Црна Гора, Филмскиот центар на Србија како и од SEE Cinema Network.

 Кино-премиерата на филмот во Црна Гора и Србија е најавена за овој месец, а во исто време почнува и кино-дистрибуцијата во регионот. „Планета 7693“ наскоро ќе биде достапен и на редовниот репертоар во македонските кина. мд/цр

Фото: Постер