Тарава, 31 декември 2024 (МИА) - Градовите ширум светот се подготвуваат да ја пречекаат Новата 2025 година со прослави кои ги истакнуваат локалните култури и традиции. Новата година прво пристигнува - напладне по средноевропско време - на малиот остров Лајн, што припаѓа на островската држава Кирибати во централниот дел на Тихиот Океан.

Тие острови се наоѓаат на иста географска должина како и Хавајските острови, така што 1-ви јануари треба да пристигне на двата архипелага во исто време, но Хаваите ќе мора да чекаат уште 26 часа за да пристигне Новата година, бидејќи од административни причини меѓународниот датумска граница го заобиколува Кирибати.

По Кирибати, Новата година ќе пристигне на далечниот исток на Азија, во Нов Зеланд, потоа во Австралија, а потоа преку Јапонија, Индонезија, Кина, Индија и други азиски земји ќе стигне до Европа и Африка, пред да продолжи преку Атлантикот до двата американски континенти до пацифичките острови Хаваи, Американска Самоа, островите Ниуе и Мидвејски Острови.

Последните населени места кои ќе влезат во 2025 година се островите Ниуе и Американска Самоа, кои се наоѓаат југозападно од Кирибати во јужниот дел на Пацификот.

По Кирибати, Новата година доаѓа и во Нов Зеланд, а во најголемиот град во земјата, Окленд, се очекува илјадници луѓе да дојдат во центарот на градот или да се искачуваат на вулканските врвови за да уживаат во огномет.

Во Сиднеј, Австралија, повеќе од милион луѓе се очекува да го гледаат традиционалниот огномет над пристаништето, со поп ѕвездата Роби Вилијамс и церемонија посветена на домородните луѓе.

Јапонија се подготвува за најважниот празник во годината - Годината на змијата, која е добредојдена како година на обновување во азискиот хороскоп.

Во Јужна Кореја прославите беа скратени или откажани поради национална жалост поради авионската несреќа во која загинаа 179 лица.

Во Џакарта, Индонезија, прославата ќе биде одбележана со огномет.

Во Рим традиционалната новогодишна прослава ќе го означи и почетокот на Светата година, која ќе ја предводи папата Франциск.

Париз ќе ја заврши 2024 година со традиционално одбројување и огномет на Шанзелизе.

Лондон ќе ја пречека Новата година со огномет на Темза, додека прославите во Единбург се откажани поради невреме.
Повеќе од два милиони луѓе се очекува да присуствуваат на новогодишната прослава на плажата Копакабана во Рио де Жанеиро.

Браќата Џонас ќе настапат на Тајмс Сквер во Њујорк, додека во Лас Вегас се планирани осум минути огномет од покривите на девет казина.

Во Пасадена, Калифорнија, илјадници посетители ќе присуствуваат на Парадата на розите, по што ќе следи трчање од пет километри.

Во Нешвил, Тенеси се очекува прослава со кантри-музички ѕвезди, додека на полноќ ќе биде спуштена музичка нота висока пет метри. рп/

Фото: МИА архива