САД разговараат со Киев за целите на украинската операција во рускиот регион Курск
- САД продолжуваат да разговараат со официјален Киев за целите на украинската воена операција во руската област Курск, изјави портпаролот на Пентагон, генерал-мајор Пат Рајдер.
![САД разговараат со Киев за целите на украинската операција во рускиот регион Курск](https://mia.mk/index.php/images/20240821064009_big_730x400_55.webp )
Вашингтон, 21 август 2024 (МИА) - САД продолжуваат да разговараат со официјален Киев за целите на украинската воена операција во руската област Курск, изјави портпаролот на Пентагон, генерал-мајор Пат Рајдер.
„Го слушнавте претседателот Зеленски како рече дека ова создава тампон зона, па ги продолжуваме дискусиите за да дознаеме повеќе за целите на Украина. Нашиот фокус ќе продолжи да биде да и помогнеме на Украина да биде слободна и суверена земја, способна да ја одврати руската агресија во иднина“, рече Рајдер за време на брифинг. Запрашан од новинарите дали САД размислуваат за укинување на ограничувањата за украинските напади на руска територија, Рајдер рече дека американската политика во однос на ударите од голем дострел не е променета.
Тој посочи дека САД секогаш бараат начини да ја забрзаат помошта за Киев, а Контакт групата Рамштајн е одлична платформа за разговори за тие прашања.
Властите во Киев објавија дека украинската армија започнала офанзива на пограничниот регион Курск во Русија за да го запре руското гранатирање на украинските погранични региони.зш/
фото ЕПА