5 декември 2024 

Кавадарци - Осветлен е скијачкиот центар во Михајлово, информираше денеска кавадаречкиот градоначалник Митко Јанчев, на неговиот Фејсбук профил. 

- Се поставија 18 столбови во висина од 10 метри за осветлување на кои се поставени по 2 лед рефлектори од по 200W, на ски патеката и 1 столб со 4 лед рефлектори од 200W за осветлување на теренот, појасни тој. Притоа додаде дека во моментов се поставува и ски лифтот со останатата опрема, со што, како што нагласи,  проектот е во завршна фаза и се очекува скијачкиот центар да биде отворен до крајот на овој месец.

Скопје - Патот до село Дуф во Општина Маврово - Ростуше  е прооден, а екипата за расчистување е се уште на терен за довршувањето на работата. Во текот на неделава ќе се расчистува патниот правец Маврово - Галичник, информира денеска Центарот за управување со кризи (ЦУК).

- Регионалниот ЦУК Тетово известува по добиената информација дека патот Маврово - Галичник од 3 декември 2024 се уште не е прооден, било веднаш стапено во контакт со „Македонијапат“, пункт Маврово од каде известиле дека ќе прават договор со трети лица и ќе преземаат активности за расчистување на тој пат во текот на неделата, соопшти ЦУК. 

Скопје - Од ЕВН Македонија АД информираа дека денеска без електрична енергија ќе останат дел од корисниците од неколку улици во општините Карпош и Сопиште.

Во периодот од 08.30 до 14.00 часот, без струја ќе бидат дел од корисниците од ул. „Осло“, во општина Карпош.  Без струја во периодот од 09.00 до 14.00 часот, ќе бидат дел од корисниците од улиците „Бриселска“ и „Копенхагенска“, во општина Карпош, како и корисниците од ул. 4 во Горно Соње, општина Сопиште.

Скопје - Седумдесет напуштени и хаварисани возила досега се отстранети од јавните површини на подрачејто на Општина Центар во рамки на акцијата што општината ја спроведува во соработка со ЈП „Паркинзи на Општина Центар“ и МВР, информираа од Општина Центар.

Општинските служби поставиле опомени на 95 возила, од кои 30 се подигнати од Пајак-службата на ПОЦ, 20 се отстранети од сопствениците, а дополнителни 20 возила се дислоцирани по телефонска пријава од граѓаните.

Струга - Здружението за промоција на документаристика „МакеДокс“ денеска во „Јуроп хаус Струга“ ќе го прикаже документарниот филм „Чуварите на Амазон“, во рамки на „Зимски МакеДокс“. По проекцијата на филмот, како што најави Здружението, што ќе следи дискусија за заштитата на животната средина, поврзувајќи ги предизвиците на дождовните шуми во Амазон со регионот Охрид-Струга.

Според најавата, говорници на дискусијата ќе бидат Дарко Ќитаноски и Наум Илиески од здружението „Еко-свест“ од Вевчани и Владимир Трајановски од СОС - Охрид.

Скопје - ЈП Водовод и канализација - Скопје соопшти дека денеска поради уличен дефект ф- 2 на Кеј 13-ти Ноември 60, прекинато водоснабдување ќе имаат корисниците од населба Маџир Маало.

Водоснабдувањето ќе биде прекинато од 09:00 часот до завршување со санација на дефектот.