Њу Делхи, 20 август 2024 (МИА) – Врховниот суд на Индија денеска формираше национална работна група составена од лекари кои ќе дадат препораки за безбедноста на здравствените работници на нивните работни места. Одлуката е донесена по силувањето и убиството на лекарка во Калкута, што предизвика протести низ целата земја.

- Заштитата на безбедноста на машките и женските лекари е прашање на национален интерес и принцип на еднаквост. Нацијата не може да чека уште едно силување за да преземе некои чекори, изјави главниот судија.

Лекарите ширум Индија стапија во штрајк, одржаа протести, маршеви и одбија да примаат пациенти кои не се итни случаи по силувањето и убиството на 31-годишна лекарка на 9 август во главниот град на индиската сојузна држава Западен Бенгал, Калкута.

Сторителот, кој волонтираше во болницата, е уапсен и е обвинет, но семејството на жртвата тврди дека имало групно силување и оти биле вмешани повеќе луѓе.

Судот, исто така, побара од федералната агенција што го истражува убиството да поднесе извештај за истрагата в четврток.

Прекинот на работата на лекарите погоди илјадници пациенти ширум Индија. Тие бараат построги закони за да се заштитат од насилство, вклучително и секој напад врз дежурните лекари да биде прекршок за обвинетите односно да нема можност за привремено ослободување додека трае судењето. ми/

фото: Икс