Тирана, 1 април 2025 (МИА) – По повод 16-годишнината од членството на Албанија во НАТО, шефот на државата Бајрам Бегај, оценува дека „Албанија се покажа како достојна членка на алијансата“

„16 години во НАТО. Албанија денеска со гордост ја слави 16-годишнината од своето членство во најуспешниот сојуз за колективна одбрана, НАТО. Во овие 16 години Албанија се покажа како достојна членка на алијансата со придонеси и активно учество во мисиите и операциите на НАТО. Нашата земја ќе продолжи да биде посветена на евроатлантската алијанса за силен, обединет и солидарен НАТО, објави шефот на државата на својот официјален профил на социјалните мрежи.

Министерот за Европа и надворешни работи, Игли Хасани во објавата напиша дека земјата придонесува за зајакнување на мирот, безбедноста и стабилноста во регионот.

„Ние го имаме НАТО, а НАТО ја има Албанија! Со новите геополитички контексти ќе го зајакнеме партнерството со нашите сојузници и со гордост ќе продолжиме со нашиот придонес за зајакнување на мирот, безбедноста и стабилноста во регионот и пошироко, порачува Хасани.

Според него, патувањето на Албанија кон НАТО ја одразува силата, безбедноста и солидарноста, изразувајќи гордост што земјата стои покрај сојузниците за посигурна иднина додавајќи дека „Албанија останува посветен и сигурен сојузник на НАТО, најдолготрајниот и најмоќниот сојуз во светот“.

„Горди на нашата улога во Алијансата! Денес нашите вооружени сили придонесуваат во мисиите за безбедност и стабилност рамо до рамо со нашите сојузници, демонстрирајќи ја определбата на Албанија за колективна одбрана и траен мир“, напиша министерот за одбрана Пиро Венгу.

Оценува дека членството на Албанија во НАТО на 1 април 2009 година е едно од најважните историски достигнувања за земјата и за целата албанска нација. вт

Фото: Бегај, Хасани, Венгу ФБ