Вашингтон, 20 јануари 2025 (МИА) - Федералната управа за авијација во САД (ФАА) ѝ наложи на компанијата „Спејс-Икс“ да спроведе темелна истрага за причината за експлозијата на нејзината „Старшип“ ракета за време на летот на 16 јануари. Додека ФАА не издаде дозвола, компанијата нема да може да лансира друга ракета.

При пробниот лет минатата седмица, ракетата првично успешно ја напушти лансирната рампа, но осум и пол минути подоцна се случи експлозија. Поради ова, ФАА оцрта област каде што би можела да има паднати делови од ракетата. Пренасочени се и летови, објави „Сан“ (The Sun).

Во инцидентот нема повредени луѓе.

Success is uncertain, but entertainment is guaranteed! ✨
pic.twitter.com/nn3PiP8XwG

— Elon Musk (@elonmusk) January 16, 2025

Инаку, првичните информации покажуваат дека пожарот избувнал во задниот дел на ракетата. Внатрешната истрага натаму треба да утврди што ги предизвикало проблемите и експлозијата и во својот извештај да наведе какви корективни мерки ќе се преземаат за тоа да не се повтори. 

Ова не е прва експлозија на „Старшип“ ракета. Според некои претпоставки, тоа може да е последица од повеќекратната употреба на овие ракети.  си/паг/

Фото: МИА архива