Рим, 7 април 2025 (МИА) – Искусниот 73-годишен тренер на Рома, Клаудио Раниери, по неделното реми 1-1 против Јувентус, повтори дека ќе се пензионира на крајот на сезоната, но овојпат засекогаш, објавија денеска италијанските медиуми.
Раниери ја почна својата тренерска кариера во 1986 година во нисколигашот Вигор Ламеција, а потоа стекна репутација во Каљари (1988-1991), предводејќи го клубот од третолигаш до Серија А.
Тренер на бројни великани, меѓу кои Рома, Наполи, Јувентус, Интер, Атлетико Мадрид и Челзи, италијанскиот стратег „докторираше“ на клупата на Лестер (2015-2017), предводејќи го англискиот клуб до единствената титула во Премиер лигата во славната сезона 2015/2016.
„Кога минатата година ја завршив работата во Каљари, бев сигурен дека засекогаш се повлекувам. Дојдоа понуди, но јас ги одбив. Знаев дека единствениот начин да се вратам е ако дојде повик од Каљари или Рома. По заминувањето на Де Роси, верував дека можам да здивнам бидејќи кормилото го презеде Иван Јуриќ. Се надевав дека повикот нема да дојде бидејќи во спротивно тоа би значело дека Рома е во неволја. Морав да одговорам на повикот на Рома, но им кажав дека по крајот на сезоната се повлекувам, но сега тоа значи засекогаш. Како и да заврши ова мое последно патување, јас се држам до тоа. Патував низ светот 35 години поради фудбалот, но никогаш немав време да го видам. Пред да умрам сакам да видам што има надвор од фудбалот, мислам дека тоа е фер. Биг Бен отчукува и ми вели дека времето истече“, изјави Раниери. ег
ФОТО: ЕПА