Македонска Каменица, 5 февруари 2024 (МИА) - Градоначалникот на Македонска Каменица Димчо Атанасовски одржа работна средба со директорот на Центарот за развој на Источен плански регион Трајче Здравков и досегашната директорка Зујица Ангелова.

Тема на разговор на средбата, како што соопшти денеска Атанасовски, била реализацијата на тековните и идните проекти во Општина Македонска Каменица и регионот.

-На состанокот присуствуваа и претставници од Општина Македонска Каменица, кои активно се вклучени во спроведувањето на проектот „Преку подобро искористување на природното и историското наследство до зголемена туристичка атрактивност на прекуграничниот регион“. Овој проект предвидува „Обележување и трасирање на велосипедска патека по сртот на Осоговските Планини во Македонска Каменица“. Неговата подготовка е во завршна фаза, односно пред потпишување на Договор за реализација, информира Атанасовски.

Дополнително на средбата било разговарано за нови и идни проекти кои ќе бидат реализирани во соработка со Центарот за развој на Источен плански регион. 

-Ова партнерство е од особена важност за развојот на нашиот град, со унапредување на локалната инфраструктура и нашите туристички потенцијали. Општина Македонска Каменица останува посветена на реализацијата на проекти од интерес на граѓаните, додаде Атанасовски.

Најави дека Општината продолжува со посветено работење и активна соработка за подобрување на квалитетот на живот на граѓаните во општината и регионот. вс/мд/

Фото: Општина Македонска Каменица