Неготино, 5 февруари 2025 (МИА) - Апел до сите угостителски објекти во Неготино, викендов да се воздржат од музика, во чест на 22 - годишната Фросина Кулакова која беше усмртена на улицата ,,Партизанска" во Скопје, е јавно упатен преку фејсбук група посветена на овој град. 

- Ги замолуваме менаџерите и сопствениците на кафулиња, ресторани и кафеани, овој викенд да се воздржат од ангажирање на бендови и гласна музика, во знак на почит кон нашата Фросина, пишува во објавата.

Притоа се бара да се покаже солидарност и да се испрати јасна порака „доста е со сообраќајното насилство". 

- Да не дозволиме ова да се повтори, е апелот упатен до јавноста. 

Истовремено,  протестен марш, насловен ,,Стоп за сообраќајното насилство", закажан е за во сабота во 14 часот во Неготино,  информираа организаторите на настанот. 

Објавена е и информација дека другарките на Фросина, организираат бесплатен автобус од Скопје до Неготино и назад, за сите што сакаат да присуствуваат на протестниот марш. свд/

Фото: Фејсбук група ,,Неготино, прашања, изгубено - најдено, превоз, огласи"